Arangkada for July 23, 2005

 

SUNOD CHAVIT?

 

Ang mga lider sa oposisyon dinhi sa Sugbo nagplano sa pagtigom sa mga kasinatian sa nagkalainlaing mga kandidato nga modason sa mga pasangil sa lapad nga tikas sa eleksiyon sa Sugbo sa niaging tuig. Pipila sa pasiunang mga pasangil nga nabisto atol sa Kapamilya Media Forum sa DYAB Abante Bisaya, ABS-CBN Cebu ug SkyCable:

• Hapit moabot og 100% ang turnout sa mga botante sa Barangay Suba, Cebu City, segun pang kanhi barangay kapitan Nicasio Jaca;
• Gikandadohan ni Naga Mayor Ferdinand Chiong ang munisipyo ug wa pasudla ang mga representante sa oposisyon atol sa municipal canvass, segun pang kanhi kongresista Celestino Martinez Jr. ug kanhi assemblyman Adelino Sitoy; ug
• Kandidato pagka-mayor sa amihanang Sugbo niingon nga nasakpan sa NBI experts nga apil sa nagsuwat sa pekeng mga balota mao ang naproklamar nga kandidato pagka mayor sa ilang lungsod.

-o0o-

Inanay nang nitumaw ang mga ebidensiya sa lapad ug agresibo nga maniobra sa Malakanyang pagpatay sa impeachment complaint batok ni Presidente Gloria Macapagal-Arroyo pinaagi sa pagluok ining daan sa House of Representatives aron nga di na masumiter ngadto sa Senado. Sa kataposan, duna na gyoy nibarug human sa pipila ka adlaw nang pagkatap sa mga huhungihong nga gitanyagan og makalilisang nga mga suburno ang mga kongresista nga gitoohang mamirma sa impeachment complaint nga isumiter na unyang Lunes.

Siya si Kongresista Eulogio Magsaysay sa Alliance of Volunteer Educators (AVE) kinsa niangkon nga gitanyagan siya sa mga representante sa administrasyon og P500,000 nga cash ug P5 milyones nga balor sa mga proyekto. Gipasaligan pa gyod si Magsaysay nga iapil sa tiket sa administrasyon sa eleksiyon sa 2007. Nihulga siya paghingan sa mga niduol niya kon ilang ipanghimakak ang iyang mga pasangil.

-o0o-

Ambot kinsay naghulhog sa kampo ni Presidente Arroyo nga mokalma nang krisis kon di makabuylo ang impeachment process. Mahimo bang pahinumdoman ang presidente nga ang paglaom nga mas mapasabot ang kontrobersiya pinaagi sa impeachment ang usa sa hinungdan nganong wa pa manggawas ang minilyon ka katawhan sa kadalanan aron pagdemanda sa iyang ulo?

Nisaad si Presidente Arroyo, human siya nisalikway sa mga awhag sa resignasyon, nga iyang atubangon ang mga pasangil batok niya pinaagi sa impeachment. Kon hasta ni di niya tumanon, di na maglibog ang kinabag-an unsaon siya pagpalagpot sa Palasyo.

-o0o-

Niay laing atanganan: Ang sunod saksi ni Arsobispo Oscar Cruz gihulagway nga sunod nga "Chavit Singson" kay direktang molambigit ni Presidente Arroyo sa payola sa jueteng. Giingong nakakita sa pagtunol ni Presidente Arroyo sa dakong bantal sa kuwarta sa jueteng ngadto sa iyang mga lider sa iyang bay sa La Vista, Quezon City Mayo ug Hunyo sa niaging tuig.

Pero ang saksi nga giingong dakong lider sa administrasyon mopaila lang kon makumbinser nga apiki na si Presidente Arroyo. [30]  leo_lastimosa@abs-cbn.com