Arangkada for July 25, 2005

 

                SUD SA LIT-AG?

 

        Natinuod gyod ang kahadlok sa politikanhong oposisyon, nga maoy hinungdan nganong nanagana sila pagsubay sa ruta sa impeachment sa ilang paningkamot pagpalagpot ni Presidente Gloria Macapagal-Arroyo sa Malakanyang.   Gisalikway ni Presidente Arroyo ang impeachment complaint nga gipasaka sa House of Representatives pinaagi sa duha ka technicality:

v     Una, ang pasangil nga nanikas siya sa niaging eleksiyon tungod sa iyang pagsugo ni kanhi Comelec Commissioner Virgilio Garcillano pinaagi sa telepono pagmaniobra sa eleksiyon sa Mindanao nahitabo sa wa pa magsugod ang iyang termino niadtong udtok tutok sa Hunyo 30, 2004; ug

v     Ikaduha, Di mahimong gamiton ang kontrobersiyal nga "Hello Garci tapes" nga ebidensiya sa impeachment proceedings sa Kongreso batok niya sa way paglapas sa konstitusyon ug sa Anti-Wiretapping Act ( R.A. 4200).

-o0o-

        Na-syut bang maru nga mga politikanhong kaatbang ni Presidente Arroyo sa iyang laang?   Human napakyas pagkumbinser sa kinabag-an sa katawhan pagmartsa sa kadalanan aron modason sa awhag para sa resignasyon sa presidente, magapos na ba sila karon sa proseso nga segurong mo-absuwelto sa sinumbong?

v     Segurong moinsistir ang Malakanyang nga di na makahimo ang oposisyon pag-usab sa orihinal (ug gihulagway nga huyang) nga impeachment complaint batok sa presidente;

v     Kon di kakolekta ang oposisyon og 79 botos, mahimong tungod kay wa matarung pag-andam ang kaso o tungod sa agresibong kampanya pagsuburno sa Palasyo sa mga kongresista, segurong idiretso pagbasura sa House Committee on Justice, nga gidominahan sa mga alyado ni Presidente Arroyo, tungod sa mga technicality nga nahisgutan sa ibabaw.

-o0o-

        Sa pikas nga bahin, kumbinsido ba gyod si Presidente Arroyo nga mohilom ug mangiyugpos na lang ang kinabag-an sa katawhan kon di tumanon ang iyang saad pag-atubang sa impeachment complaint sa Kongreso?

Kinahanglan pa ba siyang pasabton nga wa pa manggawas sa kadalanan ang katawhan di tungod sa multi-milyones pesos nga kampanya sa sipsip nga mga politiko ug binayrang mga sakop sa media kon dili tungod kay nagpaabot sila nga mahibawo unsa gyoy tinuod nga nahitabo sa niaging eleksiyon, nga mahimo lang kon iyang tugotan nga makabuylo ang impeachment trial sa Senado?

-o0o-

        Duna koy balita sa presidente:  Kon maklaro sa kadaghanan nga iyang luokon ang impeachment, sama nga nagsugod nag panggawas ang iyang pagkamang sa mga kongresista ug pagtanyag nila og P5 milyones nga balor sa kuwarta ug mga proyekto bugti sa di nila pagpirma sa impeachment complaint, di siya pasayloon sa katawhan nga hangtod karon nagpakahilom kay nihatag niya sa tanang kahigayonan pagpanalipod sa iyang kaugalingon.

        Kon maklaro nga di kaugpo ang impeachment, ang katawhan di mobalik sa ilang naandang mga gimbuhaton nga mora lag way nahitabo.   Hinunoa, di sila makapasaylo niya.

Mohukom sila base sa mga pasangil sa way pagpaabot sa detalyadong pagpanalipod sa presidente sa iyang kaugalingon.   [30]  leo_lastimosa@abs-cbn.com