Arangkada for May 10, 2005

BUNAL SA VAT Bisag unsaon og nukus-nukos sa mga sakop sa Kongreso, klarong igo lang nilang gipasa ang responsibilidad sa pagpasaka sa value added tax ngadto ni Presidente Gloria Macapagal-Arroyo. Makapa-pogi nga ilang gibasura ang 2% nga uminto sa VAT nga gisugyot sa Malakanyang. Pero gihatagan nila og standby authority si Presidente Arroyo pagpa-uminto sa VAT sugod sa Enero sa sunod tuig. Nangugat ang mga senador nga di na madaog sa katawhan ang palas-unon nga 12% nga VAT ning higayona bisan sa pasangil nga gikinahanglan ang dugang buhis pagtapak sa higanteng alkanse sa budget. Maong ilang gipugngan ang dakong bunal nga ihapak unta sa palasyo ngadto sa katawhan. Pero inay hingpit nga ibalibag, ihatag ra sab nilag balik ang dakong bunal ngadto sa presidente ubos sa kundisyon nga unya na sa Enero ihapak. -o0o- Laing gimik sa pamolitika ni Presidente Arroyo ang nabisto. Ang health cards sa Philippine Health Insurance Corp. (Philhealth) nga iyang gisabod ngadto sa mga botante sa eleksiyon sa Mayo sa niaging tuig mohupas na karong Hulyo. Sa ato pa, ang gipasalig sa presidente nga libreng coverage sa Philhealth para sa labing kabos bale lag kapin sa tuig. Human ipahibawo sa presidente sa Philhealth, Francisco Duque III, ang nag-ung-ong nga paghupas sa health cards, way bisan gamay na lang nga ek ang presidente. Kalit lang nawagtang ang iyang dakong kabalaka sa kahimtang sa panglawas sa labing kabos—nga maoy iyang gigamit nga lusot atubangan sa sibaw nga pagduda nga ang health cards gitumong sa pagpamalit sa mga boto sa mga pobre. Hinaot nga tungod ni kay gusto sa presidente nga maningkamot pagbarug sa ilang kaugalingong mga tiil ang mga timawa, ug dili tungod kay way eleksiyon karong tuiga. -o0o- Eskandaluso sang lusot ni Duque sa nabisto nga dakong alkanse sa Philhealth nga niabot og P520 milyones. Matod niya gamay ra kaayong nawagtang nga pondo kay 4% ra sa kinatibuk-ang kita sa Philhealth nga P52 bilyones. Mao bay ipasabot ni Duque nga tungod sa kadako sa ilang kita mahimo silang magwaldas-waldas og kuwarta ug di sila angayng imbestigahon? Ang P520 milyones nga nawagtang sa Philhealth nagumikan sa peke nga claims sa mga benepisyo sa mga pasyente, mga doktor ug mga ospital. Nganong nalutsan man ang Philhealth ini? Gawas sa pipila ka pasyente, doktor ug ospital nga nasakpan, giapil ba pagsusi ni Duque ang posibleng kalambigitan sa iyang mga sinaligan sa Philhealth kansang pakigkonsabo gikinahanglan aron makalusot ang anomalusong mga transaksiyon? Ug kon tinuod nga himsog ang Philhealth, suma sa panghambog ni Duque, nganong kinahanglan man silang abonohan ni Presidente Arroyo og P530 milyones nga kuwestiyonableng gikuha gikan sa OFW Medicare Trust Fund sa Overseas Workers Welfare Administration (OWWA) niadtong Marso? [30]

Email: leo_lastimosa@abs-cbn.com