Sunday, October 23, 2005

Arangkada for October 24, 2005

Bookmark and Share

      ANG PARI


Dihang gipasidan-an mi sa pari nga kinahanglang dawaton namo ang ostiyas sa among dila inay sa among kamot, nagtoo ko nga igo lang niyang gipatigbabaw ang pagtoo sa pipila ka kaparian nga ang kamot sa mga layko di takos nga modawat sa balaanong lawas ni Kristo. Pero nakugang ko sa mga hinungdan nga iyang gihatag dayong tapos sa misa:

      • Usa sa mga nisimba sa iyang misa sa Ayala wa motarung og hungit sa ostiyas ug namapha pa sa mga tipaka;

      • Kasagaran sa mga tinun-an nga nangalawat hugaw og mga kamot; ug

      • Ang ubang nangalawat bisag unsa lay gikuptan sa wa pa motambong sa misa.

Makahimo na ba diayng mga pari paghimo sa ilang kaugalingong mga lagda sa ilang misa? Mahimo na ba diay siyang mopahamtang unsaon pagdawat ang ostiyas, di tungod sa iyang pagsabot sa tukmang paagi pagdawat ini kon di tungod ra sa pagduda nga danghag ug hugaw og kamot ang pipila ka manimbahay?

-o0o-

Samang pari nanuyo sa mga nanimba nga hinayng nitubag og "Amen" sa tukmang mga bahin sa misa. Iyang gibalikbalik ang maong mga bahin hangtod nga matagbaw siya sa gikusgon sa tubag sa mga nanimbahay. Batan-on pang pari pero nahadlok kong bungulbungol na kay matagbaw ra man siya kon mosiyagit nang mga sakop sa iyang choir—nga sama niya nag-um-om og mikropono.

Gipasabot sab sa pari dayong tapos sa misa nga gusto niyang mangapil gyong tanan sa misa. Ang hinayng tubag sa mga tawo iyang giisip nga pruyba nga di kinasingkasing ang ilang pagsimba. Diin mang seminaryoha siya gitudloan nga dunggon lang sa langit ang pag-ampo kon isiyagit?

Kon saktong pari, mangahas ko pagsugyot nga inay ipanindot sa kumbento ug ipamalit sa mga panginahanglan sa kaparian ang amot sa katawhan ipamalit og daghang mikropono aron maapod ang tanang manimbahay ug mahimong mas epektibo ang ilang pag-ampo sa misa.

-o0o-

Kon matinud-anon ang kadagkoan sa Simbahang Katoliko nga motuon sa mga hinungdan sa padayong pagtidlom di lang sa gidaghanon kon dili, ug labi na, sa kalidad sa mga manimbahay, akong itanyag nga usa sa mga ebidensiya ang salida sa nahisgutang pari. Samtang nagduda ko nga ang tinuod nga hinungdan sa iyang panuyo mao ang among kapakyas pagkatawa sa taphaw niyang mga pasiaw, angay siyang pahinumdoman nga ang pagdemanda pinaagi sa pag-insistir nga siyay labing nahibawo sa ruta paingon sa langit, inay pagdaog sa atensiyon sa katawhan, maoy garantiya nga:

      • Momenos ang manimbahay;

      • Mosamot paghinay ang motubag og "Amen;"

      • Mosamot kahilom ang reaksiyon sa iyang mga pasiaw;

      • Motidlom ang amot;

      • Mogamay ang iyang bahin; ug (kon simbako sakto siya)

      • Modaghang ma-impiyerno (apil na ko). [30] leo_lastimosa@abs-cbn.com