GIUNSA PAGTIKAS
Si kanhi senador John Osmena, nga nitingob sa iyang panahon pagtuon sa mga dokumento sa Commission on Elections (Comelec) aron pagpalig-on sa iyang protesta sa eleksiyon, dunay nakit-an nga laing sukaranan sa pagduda sa resulta sa eleksiyon sa Sugbo niadtong Mayo 10, 2004: Mas daghang Sugbuanon ang nibotar sa mga kandidato pagka presidente kay sa lokal nga mga kandidato. Sa Cebu City pananglitan, nipakita og kuwentada si Osmena nga mas daghang nibotar nilang Presidente Gloria Macapagal-Arroyo, Fernando Poe Jr. ug ubang presidentiables kay nilang Mayor Tomas Osmena, Alvin Garcia ug ubang kandidato pagka mayor.
Ang beteranong politiko niingon nga sa taas niyang katuigan sa politika, mas dako ang interes sa mga botante para sa lokal kay sa nasudnongamga kandidato. Sa kada 10 nga mobotar sa mga kandidato pagka mayor, walo ra ang mobotar sa mga kandidato pagka presidente ug upat ray mobotar sa mga kandidato pagka senador.
Niinsistir si Osmena nga ang mas daghang botante para sa pagka presidente maoy usa sa lig-ong mga ebidensiya nga gimaniobra ang resulta sa eleksiyon.
-o0o-
Atol sa Kapamilya Media Forum sa DYAB Abante Bisaya ug SkyCable niadtong Biyernes, si Osmena nipasangil nga ang pagpanikas gipasiugdahan sa Malakanyang sa way pagkonsulta sa lokal nga mga kandidato sa administrasyon. Hinuon silang Mayor Osmena ug Gobernador Gwen Garcia iya sang gipasanginlan nga naghimo sa ilang kaugalingong bersiyon sa pagpanikas.
Ang taktika sa pagpanikas sa Malakanyang giingon ni Osmena nga giumol sa grupo nga gitukod ni First Gentleman Mike Arroyo human nipahibawo si Presidente Arroyo niadtong Disyembre 2002 nga di siya modagan pagka presidente. Ang pahibawo sa presidente nanukad sa giingon ni Osmena nga survey nga nagpakita nga mapilde siya bisan kinsay kandidato sa oposisyon (niadtong higayona, wa pa maklaro ang kandidaura ni FPJ).
Pero nakumbinser ni Mike ang iyang asawa nga may kahigayonan silang modaog: Ppinaagi sa pagpalapad pag-ayo sa iyang labaw sa Sugbo ug Kabisay-an aron pagtapak sa ubos sa iyang popularidad sa Luzon ug Mindanao .
-o0o-
Mao ni mga lakang sa giingong tikas sa Malakanyang nga gibisto ni Osmena:
- Gipaburot pag-ayong gidaghanon sa bag-ong mga botante (54%) pinaagi sa kuwestiyonable nga continuing registration sa Comelec;
- Ang grupo sa Malakanyang nga giingon sa Newsbreak nga gipangulohan ni Victor Rigor nagsuwat nang daan sa genuine nga mga balota, election returns, statements of votes ug certificates of canvass pila ka adlaw sa wa pang eleksiyon;
- Human sa iskutenyo sa lokal nga mga kandidato, kanus-a namiya nang kasagaran sa watchers, giilisan ang blangko nga mga balota sa inandam nga mga balota; ug
- Kay blangko mang linya para sa lokal nga mga kandidato, wa matandog ang ilang mga boto, pero niburot na pag-ayong boto sa nasudnong mga kandidato, labi nang Presidente Arroyo. [30] leo_lastimosa@abs-cbn.com
