MEDIA GILUOK
Bisan sa pasalig nga di na siya mahadlok nga moatubang ug manubag sa mga pangutana sa mga sakop sa media, aron pagpapas sa mga pagsaway sa iyang pagtago gikan sa mga sakop sa media human sa pag-ulbo sa kontrobersiya sa Garci tapes, naklaro na hinuon nga way gipili ang lapad nga maniobra sa Malakanyang—wa pasayloa bisan ang yano ra untang press conference uban sa mga sakop sa media.
- Una, ilang giabog ang foreign correspondents gikan sa kalihokan kay di pasagolan ang Malacanang Press Corps;
- Ikaduha, gipasumiter nila ang mga sakop sa press corps og mga pangutana aron nga mabasang daan ug kapangandaman ni Presidente Arroyo;
- Ikatulo, gipahibawo ang press corps nga tungod sa kadaghan sa mga pangutana, limitahan press conference sa walo lang ka topics; ug
- Ikaupat, sa 60 ka sakop sa press corps, 10 ray gitugotan nga mangutana.
-o0o-
Ambot unsay ikatampo sa pagpalambo sa demokrasya sa Pilipinas sa pag-insistir sa Malakanyang nga isumiter sa mga sakop sa media ang ilang mga pangutana sa di pa moatubang nila ang presidente. Pero di na ni bag-o. Kay mao ni panginahanglan nga naandang gipahamtang sa Malakanyang ug sa Philippine Information Agency (PIA) sa tanang interviews ni Presidente Arroyo uban sa mga sakop sa media sa nagkalainlaing mga probinsiya.
Sa di pang presidential press briefings sa White House, ang lingkoranan sa politikanhong gahom sa labing gamhanang nasud sa kalibotan, si US President George Bush ug iyang gisundang mga presidente giandam sa ilang advisers para sa tanang posibleng mga pangutana gikan sa media. Pero ambot kon mas tapolan ba lang, mas talawan, o nagtoong mas gamhanan kay sa iyang katugbang sa US ug ubang kanasuran, si Presidente Arroyo ug ang iyang mga torotot sa Palasyo, pinaagi sa ilang makauuwawang paugat, maoy magbuot unsay mga pangutana nga mapasupot sa media ngadto niya.
-o0o-
Pinaagi sa pagkolektang daan sa mga pangutana sa Malacanang Press Corps, nahibawo nang daan ang Malakanyang unsay mga pangutanang giluom sa media human sila isnaba ni Presidente Arroyo sud sa kapin sa usa ka buwan. Pero di na paigo aron hingpit nga makontrolar ang presscon. Kay dako pa gihapon ang risgo nga ang mga sakop sa media nga matawag di mosubay sa script ug mangutana sa mga pangutana nga wa maapil sa lista nga gisumiter ngadto sa Malakanyang.
Maong gipili pag-ayong Press Secretary Ignacio Bunye kinsa ray makapangutana. Ang unang gitawag mao ang representante sa Radyo ng Bayan, nga nahibawo di niya mahimong lisudlisuron ang presidente nga di mameligro ang iyang panginabuhi. Ug inay tawgon ang ubang lehitimong news organizations, giseguro ni Bunye ang reporter sa Remate, ang tabloid sa itoy sa presidente nga si Kongresista Prospero Pichay. [30] leo_lastimosa@abs-cbn.com
