LUGOS SA PARTY-LIST
May sukaranan ang mga pagduda sa kalapad sa desperadong mga paningkamot ni Pres. Arroyo pagbabag sa giwara-warang plano sa oposisyon sa bag-ong Kongreso nga mapili sa eleksiyon sa Mayo 14 pagbanhaw sa impeachment complaints nga gibasura sa iyang mga alyado sa niaging duha ka sunud-sunod nga tuig sa way pagtuki sa merito sa mga pasangil sa panikas sa eleksiyon ug pagpangawat batok niya. Nakalingkawas si Arroyo sa nahaunang mga pagsuway pagpalagpot niya sa Malakanyang kay kanunay siyang nag-una og usa o duha ka lakang sa nagkatibuwaag nga mga pundok sa oposisyon.
Ang umaabot nga eleksiyon di lahi. Samtang nagsaulog nang oposisyon sa dakong labaw sa popularity ratings sa ilang mga kandidato pagka senador, si Pres. Arroyo way tihik-tihik nga nipalihok sa kinatibuk-ang makinarya sa kagamhanan pagtino nga ang gidaghanon sa makadaog nga oposisyon nga mga kongresista di paigo sa paglaktod sa lab-as nga Articles of Impeachment ngadto sa Senado.
-o0o-
Nisiwil ang sidsid sa maniobra sa Malakanyang tungod sa pagpanguhong sa party-list groups nga gibendisyonan sa Comelec. Sa labing uwahing ihap, niabot na og 93 ka pundok ang gitugotan, mas daghan kay sa 66 niadtong 2004. Pipila nila gidudahang gitukod, gidasig, gigastohan ug busa tino nga magawongan sa palasyo. Sukwahi sa gimbut-an sa balaod nga kinahanglang magrepresentar sila sa labing huyang ug kabos nga mga hut-ong sa katilingban.
Ang ubang pundok nga nakaapil na sa nangaging mga eleksiyon gikatahong gitanyagan sab ni Arroyo og makabuhong nga pundo bugti sa ilang pagdawat sa iyang mga pahoy isip ilang numero unong nominees. Ang masuk-anong pangugat sa Comelec nga unya na nganlan ang nominees inig tak-op sa mga presinto sa alas-3 sa hapon sa Mayo 14, suma sa kusganong awhag sa Akbayan ug ubang mga pundok, nakapalig-on sa pagtuo nga ang pipila sa misteryusong nominees naghupot og mahinungdanong mga posisyon sa administrasyon.
-o0o-
Sa eleksiyon karong tuiga, 50 ka lingkoranan ang gitagana alang sa party-list groups, o 20% sa kinatibuk-ang sakop sa Kongreso. Makapalingkod ang usa ka pundok og usa ka nominee kon makakuha og 2% sa kinatibuk-ang boto alang sa party-list groups. Tulo ra hinuon ang labing daghang mapalingkod sa usa ka pundok.
Kon ang nominees sa party-list groups nga way bilib ni Arroyo ang mangharos, ug kon mapabilin sa oposiyon ang ilang kapin sa 50 ka lingkoranan, mosutoy nang impeachment ngadto sa Senado sa di pa siyang kapamilok. Aron pagmatuod nga di gyong kaapas ang oposisyon niya, si Arroyo wa matagbaw sa iyang paglugos sa party-list elections. Nagsugod na sab og bangil sa mga senador sa oposisyon nga segurong makadaog aron nga di silang kabuylo pagbalikas niya kon makalusot man gyod sa Kongreso ang impeachment. [30] leo_lastimosa@abs-cbn.com
