BAKAK O TUNGO?
Ang sibaw nga putak-putak sa mga politiko pagdason sa pasangil ug ang pagpanghimakak sa kadagkoan sa militar ug kapolisan sa giingong plano pagpatay ni Pres. Arroyo karong buwana wa katabang sa gikahadlokang pagsugod nag hanig sa sukaranan sa pagdeklarar sa martial law. Ang pasangil ni Sen. Miriam Defensor-Santiago nga nagplano silang kanhi pres. Corazon Aquino ug Senate Pres. Franklin Drilon pagpatay ni Arroyo kon mapakyas ang kudeta sa di pang Oktubre 15 gihulagway nga di aksidente kon dili maoy timailhan sa pagsugod na sa artipisyal nga kaguliyang pasiuna sa balaod militar.
Pero ang mga torotot ni Pres. Arroyo dunay dakong sipyat: Nakalimot sila pagsabot daan nilang PNP Chief Arturo Lomibao ug AFP Spokesman Buenaventura Pascual. Kay ang labing unang mahibawo kon duna may hulga nga sama sa kaseryuso sa kudeta ug pagpatay sa presidente mao ang militar ug ang kapolisan nga maoy gitugyanan sa nasudnong seguridad, di ang mga politiko nga nag-apas lang sa ilang personal nga mga interes.
-o0o-
Di pa igo nga gipanghimakak ang pangangkon ni Sen. Santiago sa bag-ong kudeta, si Lomibao nipaubos pa gyod ngadto sa normal sa "full alert status" sa kapolisan nga giisa sa Metro Manila niadtong Dominggo human sa laing pagpamomba sa Bali, Indonesia. Samang pasalig ang giluwatan sa militar nga nipasalig sa publiko sa pagpabiling kalma.
Pero wa ning kapugong nilang kanhi presidente Fidel Ramos, House Speaker Jose de Venecia ug ubang alyado ni Pres. Arroyo pagdason sa pasidaan nga posibleng patyunon gyod ang presidente. Naklaro na nga ang ilang bugtong sukaranan, kay nibalibad na mang PNP ug AFP, mao rang kasayuran ni Santiago nga igo ra sab niyang nadunggan gikan sa "tabian" pero wa ilha nga paryente ni Drilon.
Angayng pahinumdoman si Arroyo nga si Santiago wa mabantog sa iyang kamatinud-anon. Ug kamaunungon. Namakak siya parang kanhi pres. Joseph Estrada nga human nalagpot sa Malakanyang iya ra sang gibiyaan. Angayng manghinaot ang presidente nga ning higayona si Santiago igo lang namakak, wa manungo.
-o0o-
Ang mga sakop sa consultative commission nga gitukod ni Pres. Arroyo pagtuon sa kausaban sa konstitusyon ug sa sistema sa gobyerno, bisan wa pay tarung konsultasyon kon uyon bang publiko sa charter change (cha-cha) nasipyat sa pagpakita sa tinuod nilang bulok: Bisan wa pang kasugod sa ilang trabaho, kansang kapuslanan kuwestiyonable nang daan kon yak-an gyod sa mga senador ang cha-cha, ang mga sakop sa Con-Com naneguro nang daan pagpangayo og pier diem nga P2,500 sa kada tigom nga ilang matambongan.
Pila ka milyon ka pesos ang usik-usikan sa administrasyon gikan sa namiyahok nga nasudnong panudlanan aron lang pag-ulog-ulog sa mga politiko nga nautangan og kabubut-on sa presidente sa iyang pagpabilin sa puwesto bisan sa sibaw nga awhag pagpalagpot niya sa katungdanan? [30] leo_lastimosa@abs-cbn.com
