KON MAY UWAW
Kon may uwaw pa silang Dr. Jose Sal Tan ug ubang mga opisyal sa Cebu State College of Science and Technology (CSCST), ug kon wa pa hingpit nga mapapas ang ilang kaikog sa kahigwaos pagpahimus sa ilang mga puwesto, angayng magsugod na silag uli sa makabungog nga honorarium nga ilang nadawat gikan sa dakong raket nga ilang gipasiugdahan pagsupsop sa dakong kita sa evening program sa main campus ug ubang satellite schools.
Kay human nabisto ang kontrobersiya ngadto sa publiko, ug human napasaka ang reklamo sa mga magtutudlo sa CSCST ngadto sa Visayas Ombudsman, nagkauyon ang nagkalainlaing ahensiya sa gobyerno nga way katungod silang Tan ug kaubanan pagdawat og kuwarta para sa inimbentong mga posisyon nga wa nila maserbisyohi—sama sa resource lecturers, professors, teaching assistants, coordinators o facilitators.
-o0o-
Niang tubag sa Department of Budget and Management (DBM) nga nadawat sa management sa CSCST niadtong Septiyembre 8 karong tuiga: "with regard to SUC (state universities and colleges) officials and employees who serve as coordinators, facilitators, lecturers or resource persons in training programs, seminars and similar activities conducted by SUC, they are not entitled to honorarium.
"This is pursuant to Section 5 of Budget Circular No. 2003-5. The payment of honoraria shall be within the SUC budget for honoraria in the Program of Receipts and Expenditures (PRE) as approved by the SUC Governing Board for the school year.
"The income realized by the SUC shall not be used for the payment of allowances and other benefits not authorized by law pursuant to the special provisions applicable to all SUCs per R.A. 9336 (FY 2005 General Appropriations Act) and previous GAAs."
-o0o-
Inay moduko ug moangkon sa makauuwaw nilang eskandalo, mahimong padayong molalis silang Tan ug kaubanan sa mga lagda nga klarong nagdili sa ilang raket. Mahimong padayon silang mopagarpar nga gisubli pang ilang sistema ug busa way makapugong nila sa padayong pagdawat sa makalilisang nga mga honorarium.
Mahimo sab silang padayong manghaylo sa nangreklamong mga magtutudlo sa CSCST sa pagtak-om na lang bugti sa mas dakong bahin sa ilang raket. Mahimo man gani nga magpabaga ug padayong gamiton ang ilang mga torotot nga molawgaw o manghudlat sa mga sakop sa media nga nibisto sa higanteng binuang.
-o0o-
Pero tarung ba ni ug makiangayon? Tarung ba ang pagdawat og honoraria nga hasta kalima pil-a ang ilang naandang mga suholan para sa minao-mao nga mga posisyon nga wa nila aktuwal nga maserbisyohi?
Makiangayon ba nga ang padayong paburuton ang nanghupong na nilang mga bolsa samtang ang mga tinun-an, ang tag-iya sa kita sa CSCST nga angay untang pahinungdan og de kalidad nga pagtudlo ug kahimanan sa eskuylahan, padayong gihikawan sa labing batakang mga panginahanglan sa edukasyon? [30] leo_lastimosa@abs-cbn.com
