Tabang ug bantay
Dul-an sa katunga sa katawhan may pagsalig sa Comelec. Mao ni resulta sa nasudnong survey sa Pulse Asia upat ka buwan sa di pa ang labing unang automated nga nasudnong piniliay karong Mayo. Maayo ning balita alang sa institusyon nga, 24 ka tuig ang nilabay, sa kataposang piniliay sa wa pa mapukan ang diktadurang Marcos, gitunglo sa kinabag-an nga di kamaong moihap.
Labing makahuloganon nga 47% ang nisalig sa Comelec atubangan sa pagpadayag sa tanang piliunon pagka presidente, gawas ni Senador Richard Gordon, sa ilang pagduda sa kaandam ug katakos sa Comelec pagduma sa piniliay nga hingpit nga nag-agad sa Internet ug sa PCOS (precinct count optical scan) machines.
-o0o-
Dakong bahin sa nabanhaw nga kaligdong sa Comelec si Chairman Jose Melo. Nga bisan tinudlo ni Pres. Arroyo hingpit nga gisaligan bisan sa labing higpit nga kaatbang sa Malakanyang. Nagkauyon ang kadaghanan nga samtang naa pa si Melo di masubli ang paggamit sa karaang Comelec sa paglubag sa kabubut-on sa katawhan.
Laing hinungdan mao ang nabanhaw nga pagpakabana sa bag-ong mga botante, nga naglakip sa mga batan-on ug sa mga dugay na nga wa mamotar kay nawad-an na og pagsalig sa piniliay. Andam silang mohatag sa tanang kahigayonan sa Comelec pagmatuod nga mamahimo sila nga kahimanan sa pagpatigbabaw sa dugay na nilang gipangandoy nga makiangayong kausaban.
-o0o-
Angay hinuon nga magbantay ang Comelec. Ang nag-usab-usab nilang mga pamahayag ug nagkatuiris nilang mga lakang di makatabang sa pagkuha sa pagpaluyo sa kinabag-an sa mga botante:
· Gipamub-an nila ang rehistrasyon sa bag-ong mga botante bisan may igo pang panahon;
· Dihang gimandoan sila sa Korte Suprema paglugway sa rehistrasyon, nipasidaan sila nga maapiki ang kinatibuk-ang pangandam sa piniliay;
· Dihang nauswag ang pagprinta sa mga balota, nipasalig sila nga gituyo ang paglangay kay may igo pa silang panahon; ug
· Naghinobra gyod tingali ang ilang panahon kay nagdalidali man pagpalit og printer nga itabang sa National Printing Office.
-o0o-
Di makiangayon ang pagpaabot sa Comelec nga makahimo sa tanang tukmang lakang pagpangandam sa piniliay nga wa pa sukad masukad mapahigayon sa atong kasaysayan. Gikinahanglan sa Comelec ang tanang pagsabot ug tanang panabang aron nga magkadimao sa lisod nilang gimbuhaton.
Apan wa sab ni magpasabot nga molingiw na lang ta sa ilang mga bulilyaso. Nga di na lang nato buyagon ang kadudahan nilang mga lakang. Labing dakong hinungdan nganong nakapatuyang ang nangaging mga Comelec sa ilang gibati mao ang pagpangiyugpos ug paghinan-aw lang sa katawhan. Ang tinuoray ug malahutayon nga pagbantay ug pagpakabana lang sa katawhan ang makadasig ug makapaisog sa Comelec pagpatigbabaw sa kaligdong sa piniliay. Ug makapatalaw sa tang-an nga mga tikasan sa pagpangahas pagyatak sa atong balaanong katungod pagpili. [30] leo_lastimosa@abs-cbn.com
