Way uminto sa plitehan sa PUJs sa Sugbo ug Central Visayas. Ang kamandoan sa Land Transportation Franchising and Regulatory Board (LTFRB) pagtugot sa P0.50 nga uminto sa minimum nga plitehan sa PUJs igo lang ni-legalisar sa dugay nang gihimo sa mga drayber--ang pagpangolekta na og P8 nga plitehan sa unang lima ka kilometro nga biyahe sa ilang mga pasahero.
Maong kuwang sa kalipay ang PUJ drivers sa pasiunang uminto nga giaprobahan sa LTFRB samtang padayon nga gihusay ang petisyon sa ilang operators alang sa P1.50 nga uminto sa minimum nga plitehan. Kay samtang di madugangan ang ilang kita, mahimong maningil ang operators og mas dakong abangan sa ilang PUJ units.
-o0o-
Ang kasabutan tali sa mga pasahero ug PUJ drivers nga P8 nay minimum nga plitehan--gawas sa pipila ka pasahero nga nag-andam gyod og mga sensiyo ug pipila ka drayber nga nanukli gyod sa mga higayon nga duna silay mga sensiyo--tungod sa kataphaw sa mga taripa nga giluwatan sa LTFRB.Inay molingkawas sa sakit sa karaang mga liderato sa LTFRB sa pagtakda og plitehan nga wa magtugkad sa yuta, nagpatakod hinuon ang bag-ong liderato. Ang pagdumili sa mga pasahero pag-insistir sa karaang minimum nga plitehan nga P7.50 ug ang pagsabot sa mga drayber dihang P7 ray gitunol sa mga pasahero maoy labing sipa nga pagsalikway sa binuang sa LTFRB.
-o0o-
Sakto ang Sugbuanong board member sa LTFRB nga si Atty. Manny Iway: Napakyas ang transport groups pagsumiter og financial statements pagmatuod nga kinahanglan gyong umintohan ang plitehan; busa way balidong sukaranan ang LTFRB pagkuwenta sa tukma nga plitehan.Sama sa naandan, ang LTFRB nag-drowing na sab sa papel. Ang pasalig ni Transportation Secretary Mar Roxas nga ilang gi-balanse ang interes sa mga drayber ug operators sa usa ka bahin ug sa mga pasahero sa pikas nga bahin igo lang nagpasabot nga nagsugod na siya og pamugas sa iyang pagdagan pagka presidente sa 2016.
-o0o-
Kay nagdumili man gihapon ang LTFRB paghupot og mas makiangayon nga formula nga motakda sa plitehan agad sa nag-usab-usab nga presyo sa lana, spare parts ug ubang gastohan, manguros na lang tang daan: Ang mga taripa nga ilang luwatan sa mosunod nga mga adlaw, kon magpadayon man gyod pagsaka ang presyo sa lana, ipasikad lang gihapon sa taghap, banabana ug mata-mata; di lang gihapon matino unsay plitehan nga makabuhi sa mga drayber ug operators, sa usa ka bahin, ug maabot sa mga pasahero, sa pikas nga bahin.Sa ato pa, magpadayon ang mga pasahero ug mga drayber nga magsabutsabot unsay mas makiangayon nga plitehan. Pagmatuod nga mas takos silang mo-balanse sa ilang mga interes kay sa buhatan sa gobyerno nga nakalimot na sa batakan niyang tahas. [30] leo_lastimosa@abs-cbn.com
