The End Is Near?

Former Philippine defense secretary Fortunato Abat openly calls on President Gloria Arroyo to step down amid allegations of poll fraud in a press conference in Quezon City. Arroyo has called for an end to 'political warfare' as pressure mounted on her to answer allegations that she stole last year's vote.

Arangkada for June 24, 2005

 

              PAGBASOL NA

 

Ang unang nahisgot sa posibleng panag-istorya nilang kanhi Comelec Commissioner Virgilio Garcillano ug sa Sugbuanong presidente ug general manager sa GSIS nga si Winston Garcia aron pagtikas sa resulta sa eleksiyon sa Sugbo mao si kanhi senador John Osmena. Kay alyado man sila sa niaging eleksiyon, di ko mahibung kon si Osmena ra say tinubdan ni Kongresista Clavel Asas-Martinez sa iyang pangangkon nga may audio recording sab siya nga magmatuod nga tikas ang nakapadaog ni Gobernador Gwendolyn Garcia sa Sugbo.

Di hinuon masalikway ang pagduda ni Gobernador Garcia nga marka pataka ang pasangil tungod sa ka-desperado sa kongresista sa pagkapilde sa iyang banang si Celestino sa niaging eleksiyon. Pero audio recording nakapausab sa akong pagtan-aw sa mga pasangil batok sa tikas sa eleksiyon. Gawas pa, ang mga Martinez di kiko sa mga Osmena. Maong interesado kong magpaabot may lab-as ba gyong ebidensiya si Kongresista Martinez.

-o0o-

Ang angayng mas makapa-alarma ni Presidente Gloria Macapagal-Arroyo mao ang pagmahay ni Martinez sa iyang pagsuporta sa presidente sa niaging eleksiyon, apil na sa kutas nga lalis atol sa presidential canvass. Kon hinayunon ang iyang hudlat, di mag-inusara si Martinez sa pagtalikod sa naapiki nga administrasyon.

Kon hangtod karon nagtoo mong lapad pa kaayong suporta para sa presidente, awhagon mo nako pagsuway pag-ihap sa mga opisyal nga hingpit nga ni-absuwelto niya sa mga pasangil sa pagmaniobra sa niaging eleksiyon. Daghan lang gihapong opisyal nga motunga kon paadtuon sa Malakanyang o mopakita kon duawon sa presidente. Pero maihap na lang sa tudlo ang makigbuno sa ilang pagpanalipod sa presidente.

Ang labing daghang alyado sa administrasyon, sama sa kinabag-an sa katawhan, nagpaabot may dugang pa bang ebidensiya sa eskandalo o kon kinsa pay dugang mobali.

-o0o-

Kay wa man magsilbi ang orihinal nga panagang sa administrasyon nga isnabon ang audio recording kay ilegal ning nakuha, gipakatap karon sa Malakanyang pinaagi sa mga sakop sa media nga ilang binayran ug text brigades nga ilang gipabaha sa tibuok nasud ang mosunod nga mga linya sa propaganda:

• Si Presidente Arroyo bisan tinuod pang nanikas way kalainan sa iyang mga kaatbang sa politika nga modangop sab sa mga maniobra kon mao pay nakapabor;
• Di na importante limpiyo bang kadaogan ni Presidente Arroyo, mas importante nga siya karoy labing takos nga makapangu sa nasud; ug
• Ang pagtangtang ni Presidente Arroyo ning higayona makapa-islag sa mga negosyante ug makapahugno sa ekonomiya.

-o0o-

Kon tinuod man nga gihanigan nang daan sa

Malakanyang ang giingong plano sa presidente pagpangayo og pasaylo, mapaubsanon kong motambag nga dalion sa presidente ang pag-angkon sa iyang higanteng bulilyaso.

Ug hingpit nga itugyan sa katawhan, inay mangahas pagpahamtang nila sa obligasyon nga panalipdan, ang iyang kaugmaon. [30]  leo_lastimosa@abs-cbn.com