KINSAY TRAYDOR?
Si kanhi gobernador Pablo Garcia mao untay kataposang mohingan nga traydor
ang mga sakop sa Cebu Provincial Board nga nipabor sa pagtukod og tulo ka
bag-ong mga probinsiya sa Sugbo. Kay ang labing dakong sukaranan sa
kalihokan mao ang giingong pagpabaya sa Kapitolyo sa batakan ug dinaliang
mga panginahanglan sa ikaduha, ikatulo ug ikaupat nga distrito sa Sugbo.
Samtang iya ni Gobernador Gwen Garcia ang obligasyon pagpasabot giunsa
pagbahinbahin ang puntil sa probinsiya�pinaagi sa klarong kuwentada di lang
sa pinili ug limitadong mga numero nga gipagawas sa iyang mga torotot�kitang
tanan nahibawo nga ang responsable sa pagpabaya, kon mapamatud-an ang
pasangil nilang Simeon Kintanar, Antonio Yapha ug Clavel Asas-Martinez, mao
ang gisundan ni Gwen. Nakatag-an mo, si Pablo.
-o0o-
Ang labing paboritong tema sa mga nangampanya sa pagbuak sa Sugbo, nga
hingpit nga nakapkumbinser sa mga molupyo sa lagyong mga distrito sa
kamakiangayon sa ilang kawsa, mao ang dakong eskandalo nga ang Sugbo, bisan
maoy giilang labing dakong probinsiya gawas sa Metro Manila, ug bisan sa
kadako sa iyang pondo tungod sa kadako sa iyang teritoryo ug kadaghan niyag
mga industriya, way provincial hospital.
Mas maayo pang mas gagmayng natong silingang mga probinsiya, ang Bohol ug
ang Negros Oriental. Ang Vicente Sotto Memorial Medical Center (VSMMC) wa
katuman sa iyang tinuod nga mandato pagka regional hospital para sa tibuok
Central Visayas, kay maoy gihan-okan sa tanang pasyente sa Sugbo.
Kinsay responsable ning maong anomaliya? Nakatag-an mo, si Pablo.
-o0o-
Nabatyagan pag-ayong dakong haw-ang sa ka-way provincial hospital tungod sa
ka-inutil sa mga district hospitals sa Sugbo. Ang mga doctor, nurses ug
ubang mga kawani sa district hospitals gihulagway na gani nga susama na lag
trabaho sa taga Citom sa Cebu City ug Tedman sa Mandaue City. Kay di na
magtagad pagsusi sa pasyente, makakita ganig ambulansiya modiretso na lang
og pasimang nila ngadto sa VSMMC.
Samtang katapolan ug pagpabaya sa katungdanan nakatampo sa ilang kainutil,
ang district hospitals wa kadawat og suporta sa Kapitolyo para sa labing
batakan nilang mga panginahanglan. Ang mas anomaluso mao nga samtang way
igong gapas ug mga tabletas sa ordinaryong mga sakit, pipila ka district
hospitals gihatdan og nagkalata nga mga tambal sa sakit sa kasingkasing.
Gipangandaman na bang daan sa Kapitolyo nga makunsimisyon ang mga pasyente
tungod sa kakuwang sa serbisyo? O mas dakong komisyon sa wa kinahanglanang
mga tambal? Nakatag-an mo.
-o0o-
Tungod sa kainutil sa mga ospital, giawhag ang Kapitolyo pila na ka tuig
ang nilabay sa pag-enrol sa labing kabos nga mga pasyente sa Philippine
Health Insurance Corp. (Philhealth).
Nahibawo ba mo kinsay kusganong nagbalibad bisan sa kadako sa surplus sa
budget sa Kapitolyo niadtong higayona? Nakatag-an mo. [30]
Email: leo_lastimosa@abs-cbn.com
_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/
