WAY MAPILI
Ang katawhan nagduhiraw. Naglibog. Unsay ilang toohan sa nagbaha nga mga pasangil ug sumbalik pasangil? Kinsay ilang saligan sa mga lider nga way kinutoban nga naglinabayay og lapok? Kinsay ilang kasandigan nga mogiya nila paglingkawas gikan lawom nga gahong sa kahigwaos nga nihulga sa paglumos nila?
Di hinuon kong kapasalig nga tinuod nga nagpakabana ang kinabag-an sa katawhan sa mga panghitabo sa nasud karon. May sukaranan ang kahadlok nga ang tungod sa lapad nga katimawa nga nigapos nila wa silang kahigayon sa paguhiraw ug pagkalibog. Kasubo nga palandungon kon tungod sa mas dinaliang panginahanglan pagpangita og pagkaon ug panginabuhi, wa silang kayahat unsa nay gihimo sa mga lider nga gisaligan nga moduma sa nasud para nila.
-o0o-
Dako ang tentasyon sa pagtan-aw sa nasudnong krisis gikan sa panglantaw sa atong mga lider. Sayon rang pagtoo ug pagpasidungog sa lehitimong mga sukaranan sa mga lider sa oposisyon sa ilang kampanya pagpalagpot ni Pres. Arroyo. Pero may mga nakumbinser sab nga samtang wa pa kapamatud-i ang mga pasangil sa pagpanikas, pagpamakak ug pagpangawat, angayng suportahan ang awhag sa administrasyon para sa panaghiusa ug pagtinabangay.
Pero mahimo bang mobalising tag kadiyot? Ug atong tan-awon ang krisis gikan sa mga mata sa labing gagmayng mga molupyo sa nasud? Unsa man tinuod ang kahulogan sa nasudnong krisis ngadto sa ilang inadlaw-adlaw nga pagpakabuhi ug pagbugtaw sa mas sanag nga kaugmaon?
-o0o-
Magdugo ang akong kasingkasing nga motaho ninyo nga ang kalidad sa nagkabangga nga mga liderato sa administrasyon ug oposisyon nidason sa kahadlok nga way mapili nila. Ang mga namasangil nga tikasan, kawaton ug bakakon si Pres. Arroyo otro sang may bug-at nga mga bagahe nga gipas-an:
§ Si kanhi presidente Corazon Aquino napakyas pag-apod-apod sa Hacienda Luisita nga gipanag-iya sa iyang pamilya ngadto sa ilang mga mag-uuma; ug
§ Ang ubang mga lider sa nagpaluyo niya otro sang kuwestiyonable, gawas sa ilang pagpahimus sa kurakot nga mga administrasyon nilang Joseph Estrada ug Ferdinand Marcos, pipila nila gilambigit sab sa uban pang mga eskandalo.
-o0o-
Unsay sunod nga mahitabo? Unsay makalugtab ning pag-ungot sa panagbangga sa puwersang di moirog ug sa puwersang di mapugngan? Wa ko mahibawo.
Nagkinahanglan ba tag dugang mga saksi nga samag kalibre sa mga namasangil ni Erap sa iyang impeachment? O nagkinahanglan ba tag laing Ninoy Aquino nga kinahanglang mobuhis sa iyang dugo una ta mapugwat gikan sa atong paghinanok?
Makahasol hinuon ang pangagpas sa usa ka dakong opisyal atol sa Kapamilya Media Forum sa DYAB Abante Bisaya, ABS-CBN Cebu ug SkyCable gahapon: Ang atong nasaksihan mao ang proxy war tali sa mga grupong gigamit ug gisabong sa langyawng mga prinsipal kansang mga interes wa motakdo sa atong nasudnong kaayuhan. [30] leo_lastimosa@abs-cbn.com
