P100M NGA PABAYA
May sunog gani nga ang kadaot niabot og P100 milyones, motumaw dayong pagduda sa arson. Kon apil sa naugdaw ang Customs Wharfinger, nga maoy naghikay sa multi-milyones pesos nga balor sa kargamentong moagi sa Cebu International Port (CIP) gikan ug para sa ubang kanasuran, motingkag og samot ang pagduda sa arson. Kon naapil og kasunog ang Maritime Police sa Central Visayas, ang Cebu Port Authority (CPA) ug ang usa sa labing dakong kompaniya sa pantalan, Oriental Port and Allied Services Corp. (OPASCOR), mosamot og tingkag ang pagduda nga tinuyo ang sunog.
Kon ang gitumbok nga sinugdanan sa kayo, Starlight Cargo Express, gipapahawa na sa kadagkoan sa CPA kay wa na malugwayi ang kontrata nga mapupos unya sa Septiyembre, usa ka bahin sa imong galamhan mosiyagit na gyod og arson. Pero sa akong pagsuwat ini, ang mga imbestigador sa kabomberohan wa pang kakita og ebidensiya nga tinuyo ang sunog.
-o0o-
Mas klaro ang ebidensiya sa pagpabaya sa kabomberohan:
- Alas-3:30 sa kadlawon, nabantayan ni Elmer Tanguan, guwardiya sa Starlight, nga nag-aso ang usa ka bahin sa ilang bodega;
- Nisumbong siya sa mga guwardiya sa CPA nga gipangulohan ni Arthur Yap;
- Alas-3:35, nakontak ni Yap ang Cebu City Fire Department pero giingnan siya nga adto manawag sa Mabolo Fire Sub-Station kay mas duol (angayng ila-ilahon ni Cebu City Fire Marshall Ismael Codilla kinsa sa iyang mga bombero ang niisnab sa tawag sa telepono ug maoy pahimungtan sa labing bug-at nga dukol); ug
- Alas-4:05, dako na kaayong ulbo sa kayo, dihang niabot ang unang trak sa bombero.
-o0o-
Pero di monopoliya sa mga bombero ang pagpabaya. Ang CPA, gawas diay nga wa kabayad sa buhis sa ngadto sa Cebu City Hall bisan sa kadako sa ilang kita gikan sa malambuong operasyon sa mga pantalan sa Sugbo, wa katukod og iyang kaugalingong fire fighting unit, kutob ra sa pagplano pagpalit og fire trucks para sa pantalan.
Matod ni CPA Gen. Manager Mariano Martinez tungod sa dakong sunog iyang apurahon ang pagpamalit og fire trucks. Di hinuon hingpit nga inutil ang CPA kay nakabutang man og fire hydrants sa pantalan. Pero dihang gisuwayan pagamit sa kabomberohan, nakatag-an mo, wa mosakar ang ilang hose kay di standard ang gidak-on.
-o0o-
Labing dakog pilde sa sunog mao ang customs. Segun ni District Collector Lourdes Mangaoang ang naugdaw nga balor og P60 milyones nga 22 ka luhong mga sakyanan isubasta na unta sa publiko sunod buwan, kanus-a nagpaabot silang mokita ang gobyerno og labing menos P20 milyones.
Daotang balita para sa bag-ong liderato sa customs. Nga naalarma nang daan sa kahinay sa negosyo. Alkanse sa target collection ang tanang pantalan sa nasud gawas lang sa Sugbo ug Cagayan de Oro. [30] leo_lastimosa@abs-cbn.com
