PILDE SA TAK-OM
Si Presidente Gloria Macapagal-Arroyo gikatahong determinado nga magpabiling tak-om parte sa audio recording sa giingong panag-istorya nilang kanhi Comelec Commissioner Virgilio Garcillano pagtikas sa eleksiyon sa niaging tuig. Iyang gisalikway bisan ang awhag sa iyang mga alyado sa politika—silang kanhi presidente Fidel Ramos ug pipila ka mga senador ug mga kongresista sa administrasyon—ug ang ligdong nga mga lider sa ubang mga sector—silang Bishop Teodoro Bacani ug kanhi senate president Jovito Salonga—nga iyang klaruhon iya ba ang tingog sa recording.
Ang nakapait mao nga samtang hilom ang presidente, padayong nisibaw ang "Hello, Garci" nga ringtones u gang text jokes nga nahimong lehitimong alternatibo human nila gaposa ang mga estasyon sa radyo ug telebisyon ug ang newspapers pagsibya sa recording ug pagpatik sa transcript. Klarong nakaamgo sa dakong kasaypanan kay ang National Telecommunications Commission (NTC) ug Kapisanan ng mga Brodkaster sa Pilipinas (KBP) nibalitok na man sab og niuyon nga isibya ang audio recording.
-o0o-
Ang pagpakahilom sa presidente ug ang pagtago-tago ni Garcillano maoy nakapakumbinser sa sektor sa katilingban, nga sa sinugdanan nagduda unta sa katinuod sa pasangil kay di kadawat sa otro sang nangalisbong mga anomaliya sa taga oposisyon gawas nga way klarong alternatibo sa presidente, nga nagkonsabo gyod silang Presidente Arroyo ug Garcillano pagmaniobra sa resulta sa niaging eleksiyon.
Mahimong di pa ni igo pagpalihok nila pagpangampanya sa pagpalagpot sa presidente pero inanay nang napapas ang ilang pagsalig sa lider sa nasud. Ang nag-anam kadako nga haw-ang tali sa mga molupyo ug sa nasudnong liderato maoy ampay sa mga grupo nga di ganahan og malinawong kausaban. Ang mga utok-pulbora ug ubang puwersa sa kangitngit maoy labing makaginansiya ning pagpabaga ug pagpapating sa presidente.
Kay di mahimong hingpit nga ipadaplin ang audio recording tungod lang kay illegal ning nakuha. Di mapahilom ang labing sipa nga mensahe ini nga posibleng ang mandato sa presidente kinawat ug ang balaanong tingog sa mga botante, nga mahimong iyang gitampok sa bukobuko, gitabonan sa iyang hakog nga interes pagpabilin sa gahom sa bisan unsang eskandalusong paagi.
-o0o-
Ang kampanya sa propaganda sa Malakanyang pagpintal sa mga lider sa oposisyon nga mga ahente sa kagubot, mga "destabilizers," nga ang pagpagawas sa audio recording, nga giingong gigastohan ni Laarni Enriquez, kabit ni kanhi presidente Joseph Estrada, og labing menos P2 milyones, di katoohan kay:
· Si Press Secretary Ignacio Bunye, di ang oposisyon, ang unang niwarawara sa recording sa Malakanyang;
· Mas kapuslan untang recording niadto buhi pa si Fernando Poe Jr. ug ang iyang protesta batok ni Presidente Arroyo; ug
· Mahimong gisakyan sa oposisyon ang sitwasyon pero naklaro na nga di silay naghimo sa wiretapping ug di silay nagpagawas ini sa publiko. [30] leo_lastimosa@abs-cbn.com
