VIDAL NAKAISKOR
Way niawhag ni Arsobispo Ricardo Kardinal Vidal paghatag og listahan sa mga grupo ug mga indibiduwal nga nakadawat sa minilyon ka pesos nga donasyon sa Pagcor. Siya maoy niboluntaryo pagsaad paghatag og kuwentada human gibisto sa Pagcor ang listahan nga naglakip sa iyang ngan sa mga nakadawat og gikan sa P500,000 ngadto sa P4 milyones.
Maong daghang nakugang ug nahugno dihang iyang gibakwi ang iyang saad. Di kalikayan nga mas daghan ang magduda sa tinuod nga hinungdan sa kalit nga pagkausab sa iyang baruganan. Segun pa sa usa ka tigpaminaw sa DYAB Abante Bisaya nisamot kakuwestiyonable ang pagbalitok sa kardinal atubangan sa iyang kundisyon nga makig-istorya lang siya sa mga kongresista nga nagpasiugda sa Sugbuak kon mohatag silag kuwentada giunsa pagasto ang ilang pork barrel.
Pero naka-iskor ang kardinal sa iyang pag-awhag sa katawhan sa di pagpakahilom sa pagluok sa impeachment complaint batok ni Pres. Arroyo. Gipamatud-an niya nga wa siya molubay ni motalaw bisan sa malisyusong pagbisto sa listahan sa Pagcor.
-o0o-
Kon duna pay nagduda sa importansiya nga gihatag ni Pres. Gloria Macapagal-Arroyo sa iyang mga alyado sa Sugbo, makumbinser na gyod tingali sila sa kadaghan sa mga Sugbuanon nga gitangkil sa presidente sa iyang makasaysayanong pagtambong sa mga tigom sa United Nations sa New York. Apil sa dako ug saba niyang delegasyon, nga kaduha badlonga sa security personnel sa UN tungod sa way pugung-pugong nilang abiba, mao ang tulo ka kongresista—Raul del Mar, Antonio Cuenco ug Nerissa Soon Ruiz—ug si Danao City Mayor Ramonito Durano III.
Nahibawo ang presidente nga bisan nabasura nang impeachment complaint sa Kongreso wa pa mahuman ang labing grabeng krisis nga iyang nahiagoman. Maong bisan sa pagdeklarar nag kadaogan sa iyang mga torotot, wa gihapon siya mokumpiyansa. Nagkinahanglan gihapon siya sa suporta sa Sugbuanong mga lider ug ubang mga alyado sa sunod nga hugna sa padayong paghagit sa ka-lehitimo sa iyang mandato nga nakuha sa niaging eleksiyon.
-o0o-
Aron pagbaraw sa mga pagsaway sa pagasto og labing P50 milyones sa kuwestiyonableng kontrata tali ni Pres. Arroyo ug sa Venable LLP sa Washington D.C., sa kapakyas pagpahibawo ni Executive Secretary Eduardo Ermita, Budget Secretary Romulo Neri ug ubang sakop sa gabinete, si National Security Adviser nibisto nga way bisan usa ka dako nga kuwarta sa gobyerno ang matandog kay gikan sa di-pa-nila-ilhon nga pribadong mga grupo ug indibiduwal ang kuwarta nga gigasto.
Nga nisamot pagpalawom sa gahong nga ilang nahimutangan. Kinsa man ang pribadong mga kompaniya o mga tawo nga motampo og P50 milyones para sa lobby group nga gitahasan pagpangayo og kuwarta para sa pag-usab sa konstitusyon sa Pilipinas? Kon tarung ang ilang motibo ug mga negosyo, nganong mahadlok mang Malakanyang nga moila nila? [30] leo_lastimosa@abs-cbn.com
