SULBAD SA MALNUTRISYON
Ang paglusad sa gobyerno og mga programa pakigbatok sa malnutrisyon usa ka maayong lakang. Kay dugay na tuod nga nataligam-an kining seryusong problema. Pero ang plano paghimo sa gobyerno nga labing dakong tigsuplay og pagkaon, sama sa noodles, ngadto sa minilyon ka mga tinun-an sa public schools ug sa mga batan-on nga wa mag-eskuyla, maoy pagbugalbugal ug di pagtabang sa mga biktima sa katalagman.
Ang solusyon, nga giumol sa Malakanyang samtang desperadong naningkamot si Presidente Gloria Macapagal-Arroyo paghaw-as sa iyang kaugalingon gikan sa higanteng Gloriagate scandal, klarong pantalya lang. Way kalainan sa pagdagpi og ice sa agtang sa pasyente sa way pag-atiman sa tinuod nga hinungdan sa iyang hilanat.
-o0o-
Ang duha ka labing dagkong hinungdan sa malnutrisyon mao ang kaburong ug kakabos. Ang kaburong o kakuwang sa saktong kasayuran maoy hinungdan nga bisan ang mga bata sa adunahang mga pamilya nahiagom sa malnutrisyon. Di tungod sa kakuwang sa pagkaon kon dili tungod sa sayop nga pagkaon. Nagbusdik tuod sa kabusog ang tiyan sa mga bata pero wa kahatagi sa tukmang mga putahe nga makahatag unta sa ilang gikinahanglang sustansiya.
Ang kakabos di garantiya sa malnutrisyon. Pero ang kaburong sa saktong klase sa pagkaon, nga di kinahanglang mahalon ug imported aron makapalig-on ug makapabaskog sa panglawas, nga angayng ihatag sa mga bata. Ang binilyon ka pesos nga balor sa noodles nga ilawog sa mga bata sud ug gawas sa eskuylahan di makapapas sa kaburong sa mga ginikanan.
-o0o-
Mas lisod ispilingon ang kakabos. Ang ka-way kahinguhaan sa mga ginikanan maoy labing dakong hinungdan sa ilang kapakyas paghukad di lang sa tukmang klase kon dili sa tukmang gidaghanon sa pagkaon sa talad kan-anan sa ilang mga barungbarung.
Bisan kada adlaw pang pagpanghatag og noodles, kuwang ra gihapong mohulip sa usa sa tulo ka ka kaonan nga gikinahanglan kaayo sa nagtubo nga mga bata. Bisan pila pa ka tonelada ang ipabaha sa mga eskuylahan ug kabos nga mga pinuy-anan, hangtod nga di katambalan ang lapad nga kakabos ug katimawa, di maluwas sa gobyerno ang mga anghel nga nikaging na sa tibuok kinabuhi nga sentensiya sa kadaot ug kamasakiton.
-o0o-
Malampuson ang Kapamilya Tree Planting nga gipasiugdahan sa DYAB Abante Bisaya ug ABS-CBN Cebu sa Family Park sa MCWD sa Talamban, Cebu City gahapon sa sayong buntag. Gibanabanang kapin sa 500 ka mga kapamilya nga mga sakop sa nagkalainlaing organisasyon sayong nangmata aron pagtinabangay pagtanom sa 3,500 ka seedlings ug usa ug tunga ka ektarya nga luna nga gihawanan ug gilungagan nang daan sa MCWD.
Ang Kapamilya Tree Planting usa sa highlights sa ika-17 nga anibersaryo sa TV Patrol Central Visayas, ang numero unong TV news program sa Sugbo ug sa tibuok Central Visayas. [30] leo_lastimosa@abs-cbn.com
