Dunay nag-ung-ong nga balaodnon sa House of Representatives nga nagtinguha paghimong unibersidad sa kontrobersiyal nga Cebu State College of Science and Technology (CSCST). Ang House Bill 02211 gipangamahanan ni Kongresista Simeon Kintanar sa ikaduhang distrito sa Sugbo, kansang ulohang lungsod sa Argao maoy nahimutangan sa usa sa satellite schools sa CSCST. Ang balaodnon nasumiter na ngadto sa House Committee on Higher and Technical Education niadto pang Agosto 16 sa niaging tuig.
Kon maaprobahan, ang CSCST mahimo nang Cebu University of Science and Technology (CUST) ug makaangkon nag iyang tinuyong pondo. Sa ato pa, mas gawasnon na unya ang mga opisyal sa eskuylahan paglatid sa ilang kaugalingong mga lagda unsaon pagasto ang dako nilang kuwarta. Mao diay nga, segun sa akong kasaligang mga tinubdan, nagharab-harab na si Dr. Jose Sal Tan, presidente sa CSCST, nga kahatagan og laing lugway ang makabuhong niyang termino.
-o0o-
Hinaot nga di dasonan sa mga kongresista ang naghigwaos nga pag-apura nilang Tan ug ubang opisyal nga premyohan sila sa mas abunda pa nga mga benepisyo sa CUST. Hinaot nga atubangan sa sibawng mga pasangil sa pagpabusdik nilang Tan ug kaubanan sa ilang mga bolsa sa makabungog nga honorarium ug ubang kahiwian, silang Villar ug Kintanar mosusi una sa tinuod nga kahimtang sa eskuylahan:
§ Unsay kalidad sa edukasyon nga nahatag sa CSCST nga wa na mang kapalit sa batakang kahimanan kay nahurot nang kuwarta pagbayad sa honorarium sa inimbentong mga posisyon nga wa serbisyohi sa mapahimuslanong mga opisyal?;
§ Angay bang himoong unibersidad ang CSCST atubangan sa seryusong pasangil nga nahimo nang diploma mill kay nanghatag og bisan unsa na lang titulo ug kurso sa mga opisyal sa eskuylahan ug sa ilang padrinong mga politiko ug mga opisyal sa gobyerno nga way tungatunga sa klase?; ug
§ Unsa katakos ug kakasaligan ang mga tagduma sa CSCST nga gipasanginlang nipalabi pagpaburot sa ilang mga bolsa kay sa pagpalambo sa eskuylahan ug sa matinud-anong pag-umol sa kaugmaon sa ilang mga tinun-an?
-o0o-
Karong giklaro na sa nagkalainlaing ahensiya nga supak sa balaod ang pagdawat nilang Tan ug kaubanan sa makabungog nga honorarium sa inimbento nilang mga posisyon sa evening program, kanus-a pa man sila pugson pag-uli sa dakong kuwarta nga ilang nadawat ug pahamtangan sa tukmang silot sa ilang pagpahimus? Kutob na ba lang ang DBM, COA ug Ombudsman sa pag-awhag ni Tan pagsubli sa kuwestiyonable niyang sistema?
Ang mga anomaliya sa CSCST unang napadangat sa Ombudsman niadtong 2003 ug ang DBM ug COA nakabantay na sa kalapasan sa CSCST sa niagi pang tuig. Nganong gitugotan man silang Tan ug kaubanan pagpadayon pagkobra sa makabungog nilang honorarium? Kutob ba lang gihapon sa pagarpar ang hingtungdang mga ahensiya bisan naklaro nang higanteng anomaliya? [30] leo_lastimosa@abs-cbn.com
