Saturday, September 10, 2005

Arangkada for September 11, 2005

Bookmark and Share

       SUNOD KRISIS

 

       Nagsugod nang higanteng labad sa ulo ni Presidente Gloria Macapagal-Arroyo:  Unsaon pagtuman ang nagkasungi niya nga mga saad ngadto sa nagkalainlaing mga grupo ug mga indibiduwal nga iyang gigamit pagluok sa impeachment proceedings sa Kongreso.  Ang presidente wa mokumpiyansa, way gawas-gawas sa Malakanyang ug maoy nangunay pagpatawag sa mga kongresista sa Malakanyang o pagsigeg tawag nila sa telepono aron pagsegurong di mamirma sa impeachment complaint.

       Tuod man, tungod sa kadako sa buhis sa katawhan ug sa kadaghan sa mga posisyon sa burukrasya nga iyang gipabaha ug gisabod sa mga kongresista, nilampos ang presidente.  Pero wa pa gani kabuylo ang pagsaulog sa iyang kadaogan, inanayng naklaro nga di niya matuman ang tanang gisaad kay kon dili managsamang saad ang giluwatan ngadto sa nagkalainlaing politico, nagkasungi ang mga saad nga ang pagtuman sa usa magkahulogan og pagbasura sa lain.

-o0o-

       Pila ka adlaw human sa bangis nga pagpatay sa impeachment complaint, nagkadaghan ang lokal nga mga opisyal nga nakabantay sa binuang sa presidente:  Di lang duha kon dili mas daghan pang mga kongresista ang gisaaran og managsamang posisyon, o usa lang ka proyekto, o usa lang ka puwesto sa gobyerno.  Pero kamao ang presidente.  Hangtod karon, nilampos siya paghapuhap sa lokal nga mga politiko aron nga di maglangas bisan nabisto nang maayo diay nilang pagkasud sa bolsa.

       Mas lisod pahilumon si Senador Richard Gordon, kinsa nihulga pagbalhin sa oposisyon kon tumanon ni Presidente Arroyo ang iyang mga gisaad ngadto sa mga Magsaysay, ang mortal nga mga kaaway ni Gordon sa politika.  Matod ni Gordon bugti sa pagsuporta sa mga Magsaysay pagpatay sa impeachment complaint mao ang pasalig sa presidente nga libkason ang executive order nga nagdili sa importasyon sa second hand vehicles sa Subic Free Port.

       Karong nakabuylo nag yawyaw ug hudlat si Gordon, unsaon man siya pag-am-am sa presidente nga di sab mangluod ang mga Magsaysay?

-o0o-

       Mao ni ang sunod nga krisis ni Presidente Arroyo:  Ang posibleng rebelyon sa iyang mga dumadapig nga way pupanagana niyang giduwaduwaan ug giulog-ulogan.  Gawas ni Gordon, pila pa ka alyado sa presidente ang nangagot karon ang bag-ang ug naglungut-lungot na pagtalikod sa administrasyon?

       Wa katabang sa presidente ang nabisto niyang pakig-areglo sa iyang politikanhong mga kaatbang aron lang makalingkawas sa impeachment.  Usa sa labing epektibong argumento batok sa pagpalagpot ni Presidente Arroyo sa katungdanan mao ang panghadlok nga ang mopuli sa gahom mao ang gikaintapang mga puwersa nilang kanhi presidente Joseph Estrada ug Ferdinand Marcos.

       Atubangan sa kuwestiyonableng mga boto o pagpalta sa mga kongresistang alyado sa mga Marcos ug mga Estrada atol sa makasaysayanong botasyon sa impeachment complaint sa Kongreso, kinsa man karoy way uwaw nga nakigkonsabo sa gikaintapang mga puwersa sa kangitngit?  [30]  leo_lastimosa@abs-cbn.com