Sunday, July 10, 2005

Arangkada for July 11, 2005

Bookmark and Share
 

ALAS NI RAMOS

 

       Kon mangutana mo nganong nagpabilin pa si Presidente Gloria Macapagal-Arroyo sa Malakanyang, bisan sa lapad ug sibaw nang awhag sa iyang resignasyon, usa sa posibleng tubag mao ang pagkabuakbuak sa mga grupo nga managlahi og plano unsay angayng mahitabo kon mokanaog na ang presidente sa katungdanan:

·        Si kanhi presidente Corazon Aquino, ang Makati Business Club, faction sa Liberal Party ug nang-resign nga mga sakop sa gabinete gustong tumanon ang konstitusyon ug si Bise Presidente Noli de Castro ang mopuli niya;

·        Ang politikanhong oposisyon gustong magdungan pag-resign silang Arroyo ug de Castro usa ka caretaker council ang mopuli pagduma sa nasud; ug

·        Ang cause oriented groups nagplano pagtukod og transitory o revolutionary government nga maglakip sa tanang grupo nga nakigbatok sa administrasyon.

-o0o-

       Ang kahanap sa plano nga ipatuman kon mobiya na si Presidente Arroyo sa Malakanyang, bisan human motalikod sa presidente ang iyang suod nga mga alyado—ang nahibilin sa presidente mao na lang ang tradisyonal nga mga politico—nakahatag ni kanhi presidente Fidel Ramos og kahigayonan pagpagawas sa iyang alas.

       Sa di pa mag-piyesta ang mga loyalista ni Presidente Arroyo pagdeklarar ni Ramos nga manluluwas sa naapiking presidente, pahinumdoman ko namo nga grupo ra sang Ramos maoy usa sa nagsugnod sa pagtumaw sa sitwasyon nga nakahulga ni Arroyo.   Silang Heneral Fortunato Abat ug kanhi budget secretary Salvador Enriquez, mga batabata ni Ramos, maoy nagsugod sa awhag nga palagputon si Arroyo.  Si Ramos wa mokihol pagbadlong nila.

-o0o-

       Ang alternatibo nga gitanyag ni Ramos sa dihang niadto siya sa Malakanyang niadtong Biyernes sa hapon—kanus-a gitoohan nga hapit na malumpag nang Administrasyong Arroyo—dakong tamparos sa presidente.   Kon mapatuman, si Ramos nay tinuod nga hawod.  Magpabilin tuod si Arroyo sa katungdanan pero gilaslas ni Ramos ang iyang termino hangtod na lang sunod tuig.

       Ug mora na lang siyang kiko sa Palasyo.  Nga igo na lang magpaabot kanus-a mahuman ang gisugyot ni Ramos nga High Commission ug mga sakop sa Kongreso nga molingkod isip constituent assembly pag-usab sa konstitusyon ug pagpatawag og bag-ong eleksiyon sunod tuig.

-o0o-

       Nganong napugos man si Presidente Arroyo pagdawat sa sugyot ni Ramos?   Kay wa siyay kapilian.  Ang alternatibo mao nga napalayas na unta siya sa Malakanyang niadtong Sabado.  Bahalag lameduck na lang, mas madanihon gihapon ang usa pa ka tuig nga lugway pagpabilin sa Malakanyang.

       Gawas pa, ug mao ni mas dakong insentibo, ang plano ni Ramos maoy labing lig-ong garantiya nga di siya gukdon ug prisuhon sa bag-ong gobyerno tungod sa giingong higanteng mga atraso sa iyang bana, anak ug bayaw.

       Duna hinuoy nahibilin nga problema:  Unsaon nila pagkumbinser ang katawhan nga ang alas ni Ramos maoy labing makiangayong lusot gikan sa Gloriagate?  [30]  leo_lastimosa@abs-cbn.com