P5M DI SULBAD
Ang pagsud sa bagyong Crising sa teritoryo sa Pilipinas gipanghinaot nga
mao nay mohatag og kinutoban sa lapad ug bangis nga huwaw nga nipahubas sa
tubig ug nigusbat sa panginabuhi di lang sa mga mag-uuma sa kabukiran kon
dili hasta nang mga molupyo sa dagkong mga syudad. Nag-uwan-uwan nang pila
ka bahin sa Sugbo sa pagsugod ni Crising isip shallow low pressure area sa
amihanang Mindanao. Gilaoman nga mas kusog ug mas lapad nga uwan ang
mamugna karong nahimo nang bagyo si Crising nga may gikusgon sa hangin nga
55 kilometros kada oras.
Kay wa man gyoy makaseguro sa kahimtang sa panahon, hastang Pagasa niawhag
sa publiko sa pagpangaliya nga moabot nang tinguwan sa kataposang semana sa
Mayo o, labing dugay, sa unang semana sa Hunyo sa di pa madugangan ang mga
lugar nga mapugos pag-rasyon sa nihit nang suplay sa tubig.
-o0o-
Ang paglusad ni Presidente Gloria Macapagal-Arroyo sa P5 milyones nga
�freedom fund� para sa gipamatay nga mga sakop sa media ug sa nagbangotan
nilang pamilya maayong lakang. Pero di maoy solusyon sa problema. Gani,
nahadlok kong makalipat hinuon ni sa gobyerno sa pagsulbad sa tinuod nga
problema.
Samtang pipila sa gipamatay nga mga sakop sa media gidudahang apil sa
pangurakot, nga gipatay sila kay nakabahin sa kita sa ilegal nga kalihokan,
ang mayoriya sa mga biktima ligdong ug matinud-anon nga nagtuman sa ilang
trabaho�pagbisto sa mga anomaliya ug pagpatigbabaw sa kamatuoran. Pero
bisan pa ini, di sila angayng hatagan og espesyal nga pagtagad.
Kay ang pagbuwag sa media gikan sa mas dakong katilingban nga nahiagom sa
wa masulbad nga bangis nga mga krimen nahadlok kong makapasaag lang sa
gobyerno.
-o0o-
Ang nahitabo sa media�nga nisaka pag-ayong gidaghanon sa mga peryodista ug
mga magsisibya nga gipangluba�representante lang sa nahitabo sa tibuok
nasud: Makapaalarma nga pagsulbong sa kriminalidad nga wa masulbad sa
huyang ug busluton nga sistema sa hustisya.
Ang daotang balita parang Presidente Arroyo mao nga di ni masulbad pinaagi
sa P5 milyones nga freedom fund. Mahimong makapahilom ni sa mga sakop sa
media nga niisip sa ilang kaugalingon nga espesyal nga angayng hatagan og
espesyal nga proteksiyon. Pero di ning kabadlong sa mga kriminal pagpadayon
sa linuog nilang binuhatan.
-o0o-
Mahimo bang dunay makahunghong ni Presidente Arroyo nga bisan pila pa ka
milyon ang ibubo para sa witness protection program, way tarung nga mga
sibilyan nga mosugal sa ilang seguridad kon di mapapas ang pagduda nga mga
polis, militar ug mga politiko maoy konsabo sa mga kriminal.
Ug nga di kuwarta ang makaaghat sa mga saksi sa krimen pagbarug kon dili
ang pagkumbinser nila nga takos ang sistema sa hustisya pagpanalipod nila ug
pagsilot sa mga kriminal. [30] Email: leo_lastimosa@abs-cbn.com
_________________________________________________________________
FREE pop-up blocking with the new MSN Toolbar - get it now!
http://toolbar.msn.click-url.com/go/onm00200415ave/direct/01/
