ALAS NI GLO
Para ni Ricardo Saludo, ang secretary to the cabinet ni Pres. Arroyo, ang labing dakong alas nganong nagpabilin pa sila sa gahom bisan sa lapad nga protesta batok sa gikuwestiyon niyang kadaogan sa niaging eleksiyon, mao ang maayong kahimtang sa ekonomiya. Atol sa iyang pagduaw sa "Arangkada" sa DyAB Abante Bisaya, si Saludo niingon nga ang labing talagsaong nahimo ni Pres. Arroyo atubangan sa sibaw nga kampanya pagpalagpot niya sa Malakanyang mao ang pagpadayon niya pagpanimon ug pagpatuman sa tukmang mga programa pagsustinir sa nasudnong ekonomiya.
Matod ni Saludo ang ekonomiya gyod untay unang motakilid tungod sa mga protesta. Ug kon motakilid ang ekonomiya, magkadaghan ang katawhan nga madiskontento ug madugangan ang mga mobatok sa gobyerno. Pero tungod sa pagsalir sa mga kausaban nga gipasiugdahan sa presidente, padayong nitubo ang ekonomiya, maong wa makabuylo ang mga protesta sa kadalanan.
-o0o-
Lahi ang bersiyon sa oposisyon. Nilambo ang nasudnong ekonomiya bisan, dili tungod, ni Pres. Arroyo. Sukwahi sa gipatoo nilang Saludo ug ubang torotot sa Malakanyang, nagduda na sang lokal ug langyawng mga negosyante sa katakos sa presidente pagduma sa nasud tungod sa seryusong pagduda sa kalehitimo sa iyang mandato. Pero bisan pa sa panagana sa mga negosyante, nitubo gihapong ekonomiya.
Segun sa mga eksperto di ni tungod sa kamaayong ekonomista ni Pres. Arroyo, kinsa ilang gihulagway nga wa pay ikapakitang ebidensiya nga kamao siyang mopalambo sa ekonomiya. Para nila ang tinuod nga hinungdan nganong nagtungkawo pa ang presidente sa Palasyo hangtod karon mao ang malampuson niyang paglikuylikoy sa tanang pasangil batok niya hangtod nga naabtan siya sa labing kinaham nga bahin sa tuig para sa naapiking mga politiko—ang pagbaha sa dolyares gikan sa overseas Filipino workers (gibanabanang moabot og $10 bilyones karong tuiga) ug pagkasentro na sa atensiyon sa publiko, human sa tibuok tuig nga krisis ug katimawa, ngadto sa pagpanghinaot nga mapiskan gihapon og grasya atol sa pagsugat sa pasko ug bag-ong tuig.
-o0o-
Ang wa isulti ni Saludo mao nga ang abundang pamakak ug pangilad, nga naribalan lang sa gamhanang makinarya sa politika, nilampos paglibog sa katawhan ug pagsabotahe sa mga institusyon. Maong lima ka buwan na human sa pagtumaw sa Garci tapes, wa pay napresentar nga pormal nga mga saksi ug mga ebidensiya sa mga pasangil batok sa presidente. Labaw nang wa niya hisguti nga nikagar ang mga protesta tungod sa ilang panghudlat pinaagi sa pagamit og sobrang puwersang batok sa mga demonstrador.
Sa pikas bahin, ang wa isulti sa oposisyon mao nga bisan sa kalig-on sa ilang kaso sa presidente, wa silang kapakita og tarung nga alternatibo. Wa pa gyod gani magkahiusa tungod sa managlahi-ug-kasagaran-di-para-sa-nasud nilang mga interes.
Maong sakto si Saludo: Samtang napamatud-ang "immovable object" si Pres. Arroyo, wa pa mahimong "irresistible force" ang oposisyon. [30] leo_lastimosa@abs-cbn.com
