HALAD SA KAPAMILYA
Labing lab-as nga ebidensiya nga duna pay paglaom nga magkahiusa ug magtinabangay ang katawhan para sa kaayuhan sa kinabag-an mao ang makapakugang nga kainit sa reaksiyon sa mga Sugbuanon sa among gilusad nga "Halad sa Kapamilya," ang tiningob nga pagladlad sa lapad nga mga pangalagad sa ABS-CBN Cebu pinaagi sa iyang duha ka estasyon sa radyo ug mga programa sa telebisyon ngadto sa Sugbo ug kasilinganang mga probinsiya. Ang kalihokan nga ipahigayon sa Plaza Independencia unya pa sa Nobyembre 6, sunod Dominggo, pero karon pa lang init nang nagpalista di lang ang mga magpatabang kon dili hasta nang mga gustong motabang.
Gani, ang mga representante pa sa nagkalainlaing sektor sa Sugbo maoy nisugyot sa dugang mga serbisyo nga among ikatanyag atol sa tibuok adlaw nga kalihokan sunod buwan. Maong ang orihinal namong plano sa pagdungan lang unta pagtanyag sa naandan namong community outreach projects nadugangan og mas daghan pang mga serbisyo nga gihangop sab dayon sa kinabag-an sa mga Sugbuanon.
-o0o-
Ang naandan pero mas gipalapdan pang medical ug dental mission dunganan na sa libreng eye examination, pap smear, chest x-ray ug blood testing. Mas lapad sab nga libreng legal assistance ang ihatag sa boluntaryong maayong laking mga abogado sa Integrated Bar of the Philippines (IBP) Cebu Chapter ug Young Lawyers Association of Cebu (YLAC). Mapun-an pa gyod sa libreng overseas calls ngadto sa overseas Filipino workers (OFWs) sa nagkalainlaing kanasuran sa kalibotan pinaagi sa VoIP technology sa iNTouch.com.ph nga gipanag-iya sa negosyanteng si Edward Lim.
Di kay kana ra. Duna pa gyoy himoon nga seminar-workshops sa Basic English, Caregiving, Basic Photography, Basic Videography, Accounting para sa non-accountants, Basic Housekeeping, Broadcast Newswriting, Consumers Rights, Basic Computer Skills, Basic Mathematics, Bartending, Acting, paghikay sa mga pasaporte sa OFWs ug ubang manggawas sa nasud pinaagi sa Department of Foreign Affairs (DFA) ug sa mga transaksiyon sa kaliboan ka mga sakop sa Social Security System (SSS).
-o0o-
Laing makapakugang mao ang kadaghan sa mga Sugbuanon nga nagpalista para sa Basic Computer Skills nga gitanyag nga libre sa Interface Computer Learning Center kinsa gawas nga magda sa ilang computers magbawon pa gyod og mga tolda, mga lamesa ug mga lingkoranan. Nagkadaghan na gyod diay ang nakamatngon nga ang pagkat-on sa computers maoy usa sa mga yawe sa pagbugtaw og mas sanag nga kaugmaon.
Subo nga palandungon nga ang tinuod diayng hinungdan nganong biya kaayo ang gidaghanon sa mga Pinoy nga dunay Internet access kon itandi sa ubang kanasuran di ang ka-ignorante sa modernong mga teknolohiya kon dili ang kakuwang o ka-way katakos sa pagpalit o bisan pag-abang na lang og personal computers. [30] leo_lastimosa@abs-cbn.com
