ASOY SA LAKTAW I
Ang labing unang nikuwestiyon sa paglaktaw sa gobernador sa Sugbo sa mga
sakop sa Sangguniang Panlalawigan (SP) sa iyang pagsud og mga transaksiyon
dili si Board Member Luigi Quisumbing sa ikaunom nga distrito sa Sugbo.
Nagsugod ang kontrobersiya tangkod nang usa ka tuig ang nilabay, di pa board
member si Quisumbing. Ug ang unang nanalipod sa gitumbok nga anomaliya dili
si Gobernador Gwen Garcia.
Ang orihinal nga nagka-engkuwentro sa isyu mao sila si kanhi gobernador
Pablo Garcia, amahan ni Gwen, ug si Nancy Aparri, ang team leader sa COA
auditors sa Kapitolyo. Gisuwatan ni Aparri si Pablo niadtong Mayo 17, 2004
dihang iyang nakuykoyan ang pipila ka kontrata sa Kapitolyo nga way pagtugot
sa SP. Iyang gipahinumdoman si Pablo nga nakalapas siya sa section 22,
paragraph C, sa R.A. 7160, ang Local Government Code.
-o0o-
Human nadawat ang suwat ni Aparri, si Pablo nipalihok dayon sa iyang
makinarya pagpanalipod sa mga transaksiyon nga iyang gisudlan:
 Mayo 20, 2004, tulo ka adlaw human sa suwat ni
Aparri: Nangayog opinyon labot sa isyu si Ramon L. Dumayac Jr., asst.
provincial accountant, gikan ni COA Regional Legal and Adjudication Director
Roy L. Ursal;
 Hunyo 7, 2004: Nipagawas og resolusyon ang Bids and
Awards Committee (BAC) sa Kapitolyo nga gipangulohan ni Eduardo Habin nga
nibasura sa baruganan ni Aparri; ug
 Ang resolusyon sa BAC gigamit dayong Pablo sa iyang
bawos sa suwat ni Aparri nga bahaw nang balaod nga gisandigan sa COA
pagkuwestiyon sa iyang mga transaksiyon.
-o0o-
Atubangan sa pangisog ug paugat sa Kapitolyo, wa papiri ang lokal nga mga
opisyal sa COA:
 Hunyo 15, 2004: Gisuwatan ni Ursal si Dumayac nga
ang Section 22 sa R.A. 7160 wa masukwahi, busa wa ma-ammend ni ma-repeal sa
R.A. 9184 (Government Procurement Reform Act); ug
 Hunyo 22, 2004: Subling gipahinumdoman ni Aparri
ang Kapitolyo nga nakalapas sila sa balaod, ning higayona gipasukip na
niyang legal opinion ni Ursal.
-o0o-
Pero lig-on nang baruganan sa Kapitolyo. Dihang nipuli si Gwen sa iyang
amahan sa udtong tutok sa Hunyo 30, 2004, determinado siyang ipadayon
paglaktaw ang PB.
Nganong wa man dayon katimaho ang media sa kontrobersiya? Mahimong tungod
sa ilang kalinga sa kaguliyang sa eleksiyon. Mahimo sang tungod sa libreng
snacks ug paniudto sa media bureau sa mga Garcia nga wa bungkaga human sa
eleksiyon.
-o0o-
Mahimo sang tungod kay gitagoan ang kontrobersiya gikan mismo sa ubang
opisyal sa Kapitolyo. Pananglitan, si Provincial Accountant Marieto Ypil
nisuwat ni Provincial Administrator Habin kay nasagmuyo nga gipahibawo siya
sa legal opinion ni Ursal niana nang Agosto 25, kapin sa duha ka buwan human
kini nadawat sa Kapitolyo.
Sa kasamtangan, gilabay si Aparri sa Danao. (Padayunon ugma)
Email: leo_lastimosa@abs-cbn.com
_________________________________________________________________
Don't just search. Find. Check out the new MSN Search!
http://search.msn.click-url.com/go/onm00200636ave/direct/01/
