GUGMANG LUNSAY
Dul-an sa 10,000 ka mga molupyo sa Sugbo ug kasilinganang mga probinsiya ang nihugop sa Plaza Independencia sa Syudad sa Sugbo sa higanteng perya sa mga serbisyo, ang "Halad sa Kapamilya" sa DYAB Abante Bisaya ug ABS-CBN Cebu. Silang tanan nakapahimus sa way kinutobang pangalagad ug kalingawan sa nagpakabanang mga grupo sa gobyerno ug sa pribadong sektor.
Kapin sa 5,000 ang nakapahimus sa libreng konsultasyon ug mga tambal, apil nang mga bata; dul-an sa 4,000 ang nakapahimus sa libreng ibot sa ngipon; ug gatosan ang dagko sab kaayog pahiyom human nalibre sa pap smear, chest x-ray, EENT, konsultasyon sa reconstructive ug cosmetic surgery, ug eye examination og eyeglasses.
-o0o-
Gawas sa ilang pagpahimus sa mga serbisyong medikal, ang katawhan nagpanon sab pagpamili sa uban pang mga serbisyo. Labing daghan nila nakasumbong nga libre sa boluntaryong banggiitang mga abogado, nakakat-on pagamit sa computer ug pag-surf sa Internet, nakatawag nga libre sa ilang mga kapamilyang nagtrabaho sa ubang kanasuran, natudloan unsaon pagsugod og negosyo pinaagi sa pagpangluto ug pagamit sa basura isip tamnanan ug ginabas isip lawog sa mga hayopan.
Gatosan sab ang naalagaran sa one-stop shop sa mga ahensiya sa gobyerno nga nagduma sa mahinungdanon ug dinaliang mga transaksiyon, sama sa NSO, DFA, LTO, SSS, GSIS, Philhealth ug Pag-ibig. Nagpatuyang sang katawhan pagpangonsulta sa ubang mga ahensiya nga narepresentahan sa nakatungha nga mga opisyal sa Association of Government Information Officers (AGIO).
-o0o-
Di hinuon maayo ang sinugdanan sa "Halad sa Kapamilya." Ang kakuwang sa among mga tolda naklaro sa tanang hingtungdan tungod sa subli-subli nga pagbunok sa kusog nga uwan. Pero makapatandog sa balatian ang determinadong pagsungasong sa katawhan ug sa mga niboluntaryo pagtabang nila sa ngil-ad nga panahon:
· Mga abogado ug mga kliyente nga nagpasinguwan samtang padayong nagkonsultahay;
· Mga pasyenteng niseguro pagpayong sa mga doktor aron lang pagsegurong magpadayon ang konsultasyon;
· Mga kawani sa mga ahensiya sa gobyerno nga nagsinardinas ug morang nangabasa nga mga piso sud sa gamitoyng tolda pero padayong naminaw sa sumbong ug pakisayod sa ilang mga kliyente; ug
· Mga ginikanan nga nagpasinguwan aron lang matabonan gikan sa uwan ang ilang mga masuso.
-o0o-
Ang hingpit nga lahutay ug suporta sa tanang nangapil sa kalihokan di hinuon makapapas sa among responsibilidad isip mga tagduma. Maong kinasingkasing ming mangayog pasaylo sa tanang kahasol nga namugna sa among kakuwang sa pangandam ug kapakyas pagsagang dayon sa nitumaw nga mga kakulian.
Hingpit nang nitikyop ang kagabhion sa akong pagsuwat ini. Pero si Tisha Ylaya ni-text nako nga abli pang iyang "Balay ni Tikay" kay gitiwas sa nanumbay nga eksperto sa EENT ang nahibiling mga pasyente.
Bisan namo, lunsay nga paghinatagay ug paghigugmaay ang nasaksihan sa "Halad sa Kapamilya." [30] leo_lastimosa@abs-cbn.com
