Tuesday, October 11, 2005

Arangkada for October 12, 2005

Bookmark and Share
 
     TAGO SA NGITNGIT
 
Pangayog pasaylo. Mao ni ang bag-ong paboritong linya nilang Pres. Arroyo ug sa iyang mga torotot. Giawhag sa presidente ang mga lider sa oposisyon nga gidudahang apil sa pagpangespiya batok sa Estados Unidos sa pagpangayo og pasaylo. Iyang mga torotot niawhag sang Senate Pres. Franklin Drilon sa pagpangayog pasaylo sa presidente ug sa China tungod sa iyang pagsaway sa North Rail project.

Unsang matanga sa pasaylo ang gusto sa presidente nga pangayuon sa iyang mga kaatbang? Kana bang puno sa pagpaka aron ingnon? Sama ba sa pasaylo nga iyang gipangayo tungod sa iyang pakig-istorya ni kanhi Comelec commissioner Virgilio Garcillano, nga ambot nganong iyang gipangayo nga niinsistir man siya hangtod karon nga wa siyay balaod nga nalapas?

O kana bang puno sa bugalbugal? Sama sa mga pasaylong gipangayo nilang Press Secretary Ignacio Bunye ug uban niyang mga batabata human nasakpi ang kapid-an ka bakak nga gipabugwak nila sa Malakanyang?

-o0o-

Human gilampaso sa nagkalainlaing sektor ang pahibawo ni Justice Secretary Raul Gonzalez nga andam nang proklamasyon pagdeklarar og "state of national economic emergency," nipalayo dayong Malakanyang sa giilang "irong pawot" sa administrasyon ug gisalikway nga iresponsable ug way pagtugot gikan sa presidente ang iyang pagtuon ug mga pamahayag. Ug nahingpit ang papel ni Gonzalez isip abat-abat sa administrasyon.

Gawas nga gihimong berdugo pagpanghudlat sa tanang nangahas pag-apil sa kampanya pagpalagpot ni Pres. Arroyo sa katungdanan, si Gonzalez gihimo pa gyong pahoy. Gihimo siyang tambutso sa marka pataka nga mga pangilad sa administrasyon—sama sa iyang nasudnong TV address pagpasidaan sa giingong kudeta nga ilusad atol sa lubong ni Fernando Poe Jr.

(Ang sayop kasayuran gikan diay sa ISAFP nga maoy nakapaburot sa panagsungi sa paboritong intelligence agency sa presidente ug sa liderato sa AFP, nga mao say gitoohang nakapabisto sa Garci tapes gikan sa gilawalawaan nang archive sa ISAFP.)

-o0o-

Gipasanginlan ang kadagkoan sa CSCST nga nidangop sa pagpanghasi aron pagbaraw sa protesta sa ilang mga tinun-an, mga kawani ug mga magtutudlo batok sa giingong pangabuso ug pangurakot sa liderato sa eskuylahan. Ang mga tinun-an gikatahong gipanghulga nga hagbungon o di na dawaton sa ikaduhang semestre kon moapil pagsul-ob og itom ug pagdagkot og kandila. Nagtoo ba gyod silang Jose Sal Tan ug kaubanan nga maluok nilang nabistong mga pasangil sa kahiwian kon ilang pug-ukon ang lehitimong protesta batok nila?

Inay tubagon ang mga pasangil, silang Tan ug kaubanan padayong naningkamot pag-areglo sa kontrobersiya. Padayon silang nagpalaban sa ilang mga higala nga nakaila nako aron magkita mi gawas sa akong gitrabahoang sibyaanan. Pero makigkita lang ko nila atubangan sa mga mikropono sa DYAB Abante Bisaya aron mabati sa publiko ang ilang mga tubag.

Mahimo bang may makahunghong nilang Tan nga ang mga nagpuyo ra sa kangitngit maoy mahadlok sa kahayag? [30]  leo_lastimosa@abs-cbn.com