PROTESTA SA MABOLO
Nahadlok ko nga ang kadagkoan sa Cebu State College of Science and Technology (CSCST) ubos ra gyod kaayo og pagtan-aw sa kabuot sa mga Sugbuanon. Kay bugalbugal ray ilang tubag sa seryusong mga pasangil nga ilang gihimong gatasan ang pobreng eskuylahan pagpaburot sa ilang mga bolsa ug gisakripisyo ang kalidad sa edukasyon ug ang interes sa mga tinun-an.
Puwerte nilang kisikisi ug nanghudlat pa ganing mokiha human sa akong pagbisto sa gipasangil nga mga anomaliya, pero ang ilang nisunod nga mga lakang pulos nagmatuod sa pasangil sa ilang pag-abuso ug pagpabaya:
- Gihunong ang makabungog nilang honorarium sa subjects sa evening program nga wa nila maserbisyohi;
- Gidalidali pagpapanday ang kuwang nga mga lingkoranan sa classrooms; ug
- Gikarakara pagkontrata ang pagtukod mga pansayan sa eskuylahan.
-o0o-
Usa ka negosyante og puthaw sa Mabolo, Cebu City gireklamohan sa mga silingan tungod sa giingong pagbabag sa ilang agianan, gawas sa kahugaw sa ilang palibot tungod sa tayaon nga pondong scrap iron ug tighakot nga higanteng mga trak. Gipasaeradoan nang Mayor Tomas Osmena pila ka tuig ang nilabay. Pero gikatahong nawagtang ang closure order pag-abot sa barangay hall. Laing pruyba nga lig-on ang koneksiyon sa negosyante mao nga wa pa gyoy nakabaraw sa kuwestiyonable niyang operasyon hangtod karon.
Ang nagprotestang mga molupyo, nga naglakip sa mga madre sa Holy Spirit, gipahibawo sa Business Permit Section sa City Hall nga way business permit ang Eduardo Gen. Merchandise nga gipanag-iya ni Eduardo Arila sukad niadtong 1992. Nahibaw-an sab nila nga way barangay clearance ang negosyante. Nagduda ang mga molupyo nga peke ang mga dokumento nga gipakita ni Arila ngadto sa Revenue Task Force sa City Hall nga gipangulohan ni Christopher Ong.
-o0o-
Gipasanginlan sa mga molupyo ang mga opisyal sa barangay nga tua kapusta ni Arila. Ilang gitumbok silang Barangay Kapitan Sonny Borces ug Konsehal Rey Ompoc nga maoy tigdupa sa gireklamohang negosyante. Gipasanginlan nila si Borces ug Ompoc nga maoy nagyaka sa ilang reklamo bisan kon wa tumana ni Arila ang gikasabotan sa daghan nang mga husay sa barangay hall.
Si Borces ilang gihulagway nga masakiton, maluyahon ug nitugyan na lang sa kasagaran sa iyang mga gimbuhaton ngadto ni Ompoc kay di na magpapili sa sunod nga eleksiyon. Nakapait mao nga ang pagkauswag sa eleksiyon sa barangay ngadto sa 2007 nagkahulogan nga mag-antos ang taga Mabolo og dugang duha nga liderato sa kapitan nga mas malingaw sa tigbakay kay sa pag-alagad sa barangay.
Tungod ini, nakapatuyang si Ompoc sa pagpalambo sa iyang politikanhong ambisyon. Iyang gipasigarbo ngadto sa tanang interesado nga siyay kandidato ni Mayor Osmena pagka kapitan. Pero kon tinuod nga itoy siyang Arila, ambot unsay kaugmaon sa Mabolo ubos niya. [30] leo_lastimosa@abs-cbn.com
