TONG SA KEMIKAL?
Wa magkuwang ang mga doktor sa Cebu City Health Department pag-edukar sa mga politiko sa labing epektibong mga paagi sa pagbadlong sa dengue sa kabaranggayan. Napamatud-an kini sa suwat ni kanhi City Health Officer Felicitas L. Manaloto ngadto ni Mayor Tomas R. Osmena nga pinetsahan og Aogost 9, 2001.
Upat ka tuig nang nilabay, gitambagan nang Manaloto si Osmena ug ubang opisyal sa syudad nga gastuso ug di epektibo ang pagamit sa fogging machines ug mga kemikal sa pagpatay sa mga lamok nga nagda sa dengue. Maong dakong kahibulongan nganong hangtod karon duna pay mga opisyal sa syudad nga mangugat sa pagpamalit og mga kemikal batok sa dengue.
-o0o-
Ang suwat ni Manaloto ngadtong Osmena niadtong 2001 nipasabot nga ang taphaw ug temporaryong benepisyo sa kinaraang paagi pakigkombate sa dengue di maka-ambas sa higanteng gasto:
- Gawas nga mahal ang fogging machines, dako sang gasto sa maintenance sa mga makina;
- Ang operasyon nagkinahanglan og krudo ug gasolina nga nagpadayon pagsaka ang presyo; ug
- Ang mga kemikal oro sang mahalon.
Di lang ang wa kinahanglana ug way kapuslanang gasto ang
gitumbok ni Manaloto pagsalikway sa kemikal ug fogging machines:
- Ang pagamit sa kemikal di makaayo sa environment tungod sa aso ug hinungaw di lang gikan sa kemikal, kon dili gikan sab sa krudo ug gasolina; ug
- Ang hinungaw sa kemikal gawas nga pikatan lang sa lamok makadaot sa panglawas sa mga molupyo.
-o0o-
Bisan niadtong 2001, nitambag nang daan si Manaloto nga ang labing epektibong panagang sa dengue mao ang pagyabo sa nagpondong tubig nga maoy mga pinuy-anan ug itloganan sa mga lamok. Inay mogasto og minilyon ka pesos sa kemikal, niawhag si Manaloto nga palambuon ang pagpakabana sa publiko pinaagi sa pagsangyaw sa kasayuran sa kabaranggayan.
Gawas ni Manaloto, nipirma sa suwat si Health Committee Chairman Christopher Alix. Gawas ni Osmena, gihatagan og kopya sa suwat silang Bise Mayor Michael Rama, tanang konsehal ug tanang barangay kapitan. Gawas sa kahakog sa komisyon, unsa may laing katin-awan sa padayong pagpamalit og kemikal ug fogging machines sa mga politiko?
-o0o-
Mahimo bang ipasabot ni Alix nganong bisan sa iyang pagpirma sa suwat ni Manaloto niadtong 2001 nangugat man gihapon pagpangompra og mga kemikal ug mist spray machines? Nganong bisan sa iyang pagkabasa sa suwat ni Manaloto, namakak man si Konsehal Gerardo Carillo pagpasangil ni Manaloto nga maoy nagpirma sa purchase request sa kemikal?
Ug mahimo bang prangkahan ta nilang Rama ug ubang konsehal nganong bisan sa lehitimong tambag ni Manaloto upat ka tuig nang nilabay nagpiyong mang gidasonan silang Alix ug Carillo pagwaldas sa kuwarta sa mga Sugbuanon para sa ilang kinaham nga mga kemikal? [30] leo_lastimosa@abs-cbn.com
