PUTI UG ITOM
Ang panagbangga nilang Pres. Arroyo ug sa iyang mga kaatbang maoy away sa mga puwersa sa puti ug itom—di mahitabong magkaabot, labaw nang di magkasabot. Si Arroyo niinsistir nga siyay nakadaog sa eleksiyon ug busa angayng magpabilin sa puwesto hangtod sa 2010. Ang iyang mga kaatbang niingon nga kinawat ang iyang mandato maong angay siyang palagputon sa Malakanyang sa labing daling panahon.
Ang mga pagsuway paghilot sa higanteng kang-a sa ilang mga baruganan niresulta sa salikwaot nga mga sitwasyon:
-
Ang gisugyot nilang kanhi pres. Fidel Ramos ug House Speaker Jose de Venecia nga pagputol sa termino ni Arroyo aron paghatag og agianan sa pag-usab sa sistema sa gobyerno sa 2006 nahiagom sa nukus-nukos sa Malakanyang—sa sinugdanan, gisuportahan ni Arroyo, labi na niadtong hapit mapukan ang iyang administrasyon, pero sa kapulihay gisalikway na pinaagi sa pag-insistir nga tiwason gyong iyang termino; ug
-
Ang gisugyot ni Bro. Mike Velarde sa El Shaddai nga pagbahin sa gahom pinaagi sa paghatag sa 60% sa mga lingkoranan sa gabinete ngadto sa oposisyon gisalikway sa Malakanyang pinaagi sa pagpahinumdom ni Velarde nga ang mayoriya sa gabinete makahimo sa wa mahimo sa oposisyon—ang pagpalagpot ni Arroyo sa puwesto.
-o0o-
Ang kapakyas sa oposisyon pagtapok og igong puwersa nga makapugos ni Pres. Arroyo pagkanaog sa palasyo nakaaghat sa mga torotot sa administrasyon pagduso sa mas binuang nga awhag: Hingpit na lang nga paluyohan si Arroyo aron makapatuman sa iyang mga programa pagpalambo sa nasud. Samang linya ang ilang gihabol sa di makiangayong pagamit og puwersa pagbungkag sa mga demonstrador nga malinawong nipahimus sa ilang katungod pagtapok ug pagpadayag sa ilang mga reklamo batok sa gobyerno.
Pero angay silang pahinumdoman nga di ang mga protesta sa kadalanan ang hinungdan sa krisis karon sa nasud. Hagbay ra untang nipadaplin ang mga demonstrador kon wa pay nitumaw nga lig-ong mga ebidensiya sa pagpanikas sa eleksiyon ug pagpangawat sa katigayonan sa katawhan ug kon wa pa luoka sa mga alyado ni Arroyo ang proseso sa pagsusi sa mga pasangil pinaagi sa pagpaminaw sa mga testigo ug pagsubli sa ilang mga ebidensiya.
-o0o-
Bisan pag magpuyo sa ilang bay ug motak-om ang mga demonstrador ugma dayon, di mobaha ang puhonan sa mga negosyante ni mapapas ang katimawa kon magpadayon ang pagpangawat sa mga opisyal sa gobyerno—nga mas gahi nang badlungon human nakautang og kaliboan ug usa ka kabubut-on si Arroyo sa iyang pagpaugat pagpabilin sa Malakanyang.
Sa bahin sa oposisyon, di sila angayng motan-aw sa layo pagpangitag katin-awan nganong hangtod karon wa mouban nila ang kinabag-an sa katawhan. Ang bugtong himoon mao ang pagpanamin aron mahibaw-an nga sama ra silag bayhon sa tikasan ug kawatan nga gusto nilang palayason. [30] leo_lastimosa@abs-cbn.com
