TINGOG SA KATAWHAN
Ang labing uwahing survey sa Social Weather Station (SWS) nga nagpakita nga 62% sa respondents niawhag na sa resignasyon ni Presidente Gloria Macapagal-Arroyo segurong isalikway na sab sa Malakanyang. Pero kon toohan ang nang-resign nga mga sakop sa gabinete nga, kon mogawas nang resulta sa surveys nga nagpakita sa pagtibugsok sa popularidad sa presidente, ang tanang tigom sa Malakanyang gisentro sa pagtuki sa mga paagi ug mga programa nga mohimo sa presidente nga mas popular ngadto sa publiko, segurong makadugang ni sa way tulganay nga pagtukaw sa mga propagandista sa administrasyon unsaon pagpahumot ang nangalisbong administrasyon.
Ang survey niadtong Hulyo 12-14 nakakuha sab ning mosunod nga mga tubag gikan sa 608 ka respondents gikan sa 17 ka syudad ug lungsod sa Metro Manila:
· 61% kumbinsido nga gisugo ni Presidente Arroyo si kanhi Comelec Commissioner Virgilio Garcillano pagtikas sa eleksiyon sa niaging tuig;
· 66% nagtoo nga ang lahugay sa gabinete gipasiugdahan sa presidente aron magpabilin siya sa gahom ug di aron pagpalambo sa nasud;
· 91% sa mga niawhag sa resignasyon ug 76% sa mga supak sa resignasyon uyon nga palagputon siya pinaagi sa impeachment;
· 62% uyon sa pagtukod sa Truth Commission; ug
· 45% ray nagtoo nga takos si Bise Presidente Noli de Castro.
-o0o-
Ang surveys sa SWS, sama sa surveys sa Pulse Asia ug ubang research organizations, nagpakita nga lahi kaayo ang sentimento sa mga molupyo sa Metro Manila kay sa ilang mga opisyal. Hapit tanang mayor kusganong nisuporta ni Presidente Arroyo ug niinsistir nga wa siyay nahimong bisan unsang kalapasan. Pero makabungog nga mayoriya sa mga molupyo wa nay pagsalig niya ug gustong palagputon na siya sa Malakanyang.
Sayop bang SWS ug Pulse Asia suma sa mga torotot sa Malakanyang? Pero kon sayop pa, nganong gipabiyaan man sa presidente ang naandan ug mas mapuslanong mga gimbuhaton sa gabinete aron lang motabang niyag pamalandong unsaon pagbitik ang pagsalig sa katawhan?
O, sama sa naandan, wa mangonsulta ang mga politiko sa ilang mga molupyo sa ilang pagtila sa lapalapa sa ilang amo sa politika? Nailad ba lang ang Malakanyang nga ang lokal nga mga opisyal maoy nagda sa tinuod nga tingog sa katawhan? O ang Palasyo mismo maoy gusting momaniobra sa sitwasyon pinaagi sa pagpanghinaot nga ang abiba sa mga politiko makatabon sa mas lanog nga awhag sa publiko pagsilot sa tikasan nga presidente?
-o0o-
Hinaot nga ang lokal nga mga opisyal sa Sugbo nangonsulta sab sa mga Sugbuanon sa wa pa sila mangangkon nga nahigugma ang Sugbo ni Presidente Arroyo.
Kay kon gipalabi ang pagpabilib sa ilang amo, inay tumanon ang obligasyon pagrepresentar sa interes ug sentimento sa katawhan nga ilang girepresentahan, peligrong sama sa presidente isalikway sab sila sa kinabag-an. [30] leo_lastimosa@abs-cbn.com
