NAGKAYAMUKAT
Laing ebidensiya unsa na kakatag ang administrasyon ni Presidente Gloria Macapagal-Arroyo: Bisan ang paghukom holiday ba o dili ang Agosto 29 wa na magkadimao.
· Niadtong Biyernes, nipahibawo si Press Secretary Ignacio Bunye nga dunay klase ug trabaho sa Agosto 29 kay ang National Heroes' Day kanunay gyong itunong sa kataposang Dominggo sa Agosto (Agosto 28 karong tuiga) maong di angayng ipatuman ang holiday economics ni Presidente Arroyo;
· Pero pagka Sabado sa gabii, nipahibawo si Bunye nga gisugo ni Presidente Arroyo si Executive Secretary Eduardo Ermita paghimo og proklamasyon nga magdeklarar nga way klase ug way trabaho sa Agosto 29; pero
· Pagka Dominggo sa buntag, nipahibawo na sab ang Malakanyang nga ang holiday sa Agosto 29 para ra sa mga ahensiya ra sa gobyerno ug publiko ug pribadong mga eskuylahan.
-o0o-
Ang gipahibawo ni Bunye niadtong Biyernes, nga di holiday ang Agosto 29, maoy unang tambag nga nadawat sa presidente. Pero tungod sa laing grupo sa mga magtatambag nga nipasidaan nga labhan ang presidente kon di niya hatagan og igong importansiya ang National Heroes' Day, nitumaw ang sukwahi nga pahibawo niadtong Sabado sa gabii, nga way klase ug way trabaho sa Agosto 29. Dihang nikisi-kisi ang mga negosyante, labi nang labing dagko og amot sa iyang administrasyon, giusab sa presidente ang iyang desisyon sa ikatulong higayon pagka Dominggo sa buntag.
Kon nahitabo ni sa sayon kaayong desisyon pagdeklarar og holidays, unsa na kaha sa mas lisod ug mas komplikadong mga desisyon nga kinahanglang himoon sa presidente atubangan sa seryusong pagduda sa ka-lehitimo sa iyang mandato? Kapila na kaha isakripisyo ang nasudnong interes tungod lang sa managlahi nga mga tambag sa mga grupo ug mga indibiduwal nga di niya kabalibaran kay pulos nautangan og buot sa iyang pagpabilin sa puwesto atubangan sa sibaw nga awhag sa iyang resignasyon?
-o0o-
Samtang kasagaran sa dagkong eskuylahan nakahukom na nga di sila mag-klase sa Agosto 29, ang mga tinun-an ug mga magtutudlo sa mga eskuylahang publiko nagpabiling naglibog. Salamat sa dakong opisyal sa Departamento sa Edukasyon nga taguon lang nato sa ngan nga Cebu City Schools Division Superintendent Leonilo Oliva kinsa nagdumili pagtoo sa pahibawo sa Malakanyang nga school holiday ang Agosto 22 kay natunong man sa Dominggo ang sumad sa kamatayon ni kanhi senador Ninoy Aquino sa Agosto 21 kay wa siyay nadawat nga hard copy sa memorandum, bisan fax copy na lang.
Nakadugang sa ilang kalibog mao ang memorandum ni DepEd Secretary Ramon Bacani nga dunay klase sa Agosto 29, klarong gibase sa bahaw nga desisyon niadtong Biyernes.
Di mabasol ang presidente nga maglibog tungod sa giatubang nga labing grabeng krisis. Pero makiangayon ba nga iduhig ang tibuok nasud sa iyang panghunahuna nga nagkayamukat? [30] leo_lastimosa@abs-cbn.com
