BAG-ONG SULBAD
Balido ang mga sugyot ni Senador Miriam Defensor Santiago sa pagbanhaw sa kaligdong sa politikanhong liderato sa nasud. Sa wa pa siya mo-walkout sa tigom nga nangandam sa political summit nga gitakdang himoon karong Agosto, nidiskurso si Santiago ug niluwat ning mosunod nga radikal nga mga lakang:
- Kinahanglang mopirma ang tanang moapil sa summit og sinuwat nga deklarasyon nga di sila magpapili sa bisan unsang puwesto sa gobyerno human mapupos ang ilang termino aron makumbinser ang katawhan nga kaayuhan gyod sa nasud ug di personal nga kabulahanan ang ilang ipatigbabaw; ug
- Pormal nga irekomendar sa summit ngadtong Presidente Gloria Macapagal-Arroyo nga di na siya motudlo og mga sakop sa gabinete nga kapin sa 40 anyos kay ang mga opisyal nga kapin sa 40 giisip na sa kinabag-an nga kurakot ug di kasaligan.
-o0o-
Ang labing nasabak sa santako ni Santiago mao ang retiradong mga heneral, nga naglakip sa iyang mortal nga kaaway, si kanhi presidente Fidel Ramos, kinsa iyang gipasanginlan nga nanikas sa ilang panag-atbang sa eleksiyong presidensiyal niadtong 1992:
- Ang retiradong mga opisyal sa militar kinahanglang tangtangon sa puwesto ug did-an na paghupot og bisan unsang puwesto sa umaabot ang aktibong mga opisyal human sa ilang pagretiro sa pangedarong 55;
- Kinahanglang pagamyan ang militar aron maibanan ang way kapuslanang mga heneral nga, kon wa nay laing lingaw, magplano na lang unsaon pagsakmit ang gobyerno; ug
- Tangtangon sa katungdanan ang mga opisyal sa militar nga masakpang nagpa-eskuyla sa ilang mga anak sa US ug Uropa.
-o0o-
Sama sa gipaabot, inay seryusuhon pagtuki ang mga sugyot ni Santiago, gilibak siya sa mga politiko nga iyang gitalikdan nga gipangulohan sa mga trapo nga silang House Speaker Jose de Venecia ug Senador Edgardo Angara. Mahimong tinuod ang ilang paniid, labi na tungod sa politikanhong kasaysayan sa senadora, nga mahimong di seryuso si Santiago.
Pero ang radikal nga mga solusyon maoy gikinahanglan ning
krisis nga nihakop sa nasud karon. Ug kon matinud-anon ang mga arkitekto sa political summit paghiusa sa katawhan, angayng buksan ang ilang panghunahuna sa bag-ong mga ideya inay mopilit sa mga solusyon nga nakapasamot sa atong katimawa.
-o0o-
Dunay laing duha ka radikal nga ideya nga maoy angayng himoong sumsoman ug bayloan og mga panghunahuna:
- Ang sugyot ni Thads Bentulan, kansang series nagsugod sa BusinessWorld gahapon, nga umintohan ang minimum nga suholan ngadto sa P20,000 kay ang pagdugang sa purchasing power sa mga trabahante maoy yawe sa kalamboan; ug
- Ang sugyot ni Edgar Godinez, kanhi sakop sa Regional Wage Board, papason ang armadong kusog ug ibalhin ngadto sa kapolisan ang tanan nilang gimbuhaton kay, niya pa, way nasud nga may katakos pag-atake sa Pilipinas nga di molampos. [30]
