DAOG NANG DAAN
Duna koy daotang balita parang Gobernador Gwen Garcia: Seguro nang
aprobahan sa House of Representatives ang mga balaodnon nga magtukod og tulo
ka bag-ong probinsiya sa Sugbo. Tungod ni sa taras sa mga kongresista nga
di magdaghan og kuti sa pagpasar sa mga balaodnon nga lokal ang katuyoan.
Kon isumiter na sa House Committee on Local Governments, nga segurong
mahitabo kon atong toohan ang pasangil ni Capitol Legal Consultant Pablo
John Garcia nga ang tsirman sa komitiba, Emilio Macias II sa Negros
Oriental, nagdumot sa Sugbo, ang mayoriya sa mga kongresista mosuporta sa
mga balaodnon tungod sa pagtoo nga silang Simeon Kintanar, Antonio Yapha ug
Clavel Asas-Martinez maoy labing nasuhito sa ilang mga distrito.
Kon mahinayon man pagbarug si Kongresista Antonio Cuenco batok sa mga
balaodnon, ang ubang mga kongresista mohukom nga di siya angayng manghilabot
sa probinsiya kansang mga eleksiyon di na siyang kaapil.
-o0o-
Duna hinuon koy maayong balita parang Gobernador Garcia: Segurong maapiki
ang mga balaodnon paghimong upat na sa mga probinsiya sa Sugbo inig-abot na
sa Senado. Kay ang mga senador motahod sa baruganan sa bugtong Sugbuanong
senador, si Sergio Osmena III. Nga gitoohang mosuporta sa baruganan sa
iyang manghod, si Cebu City Mayor Tomas Osmena, batok sa pagbuak-buak sa
Sugbo.
Pero si Osmena nipahimutang sa iyang kaugalingon uban sa oposisyon. Gani,
sa wa pa mobalitok si kanhi senador Sonny Osmena sa administrasyon,
managsama ang baruganan sa manag-agaw sa hapit tanang dagkong kontrobersiya.
Kinsa may paminawon ni Serge: Ang mga Garcia nga maoy labing maalkanse kon
mohiyos nang ilang giduma nga probinsiya; o si Sonny nga, human sa iyang
labing unang pilde sa politika, nanganti pagtumpag sa bag-ong gingharian sa
mga Garcia nga ila rang mga batos niadto?
-o0o-
Kon makalusot ang mga balaodnon sa Kongreso, dakong sang kahigayonan nga
aprobahan ni sa mga Sugbuanon atol sa plebisito. Kay ang makabungog nga
mayoriya sa mga botante sa ikaduha, ikatulo ug ikaupat nga distrito di
mahitabong mosalikway sa kahigayonan nga mas modako nang ilang gahom ug
pondo pag-umol sa ilang kaugmaon.
Samtang ang mga botante sa ubang mga distrito, bisan sa emosyonal nga
siyagit nga mas maayong magkahiusa kay sa mabuak ang Sugbo, di sama
kamadasigon. Kay bisan pag matukod nang tulo ka bag-ong probinsiya, di
mawagtang ang ilang kadalanan ug mga taytayan ug mga panginabuhi.
-o0o-
Mahimo pa ganing kusion ang ilang konsiyensiya, labi nang taga Metro Cebu,
nga silay nakapahimus sa pondo nga para unta sa mas batakan ug mas dinaliang
panginahanglan sa hilit nga bahin sa Sugbo.
Pero si Toledo City Councilor Jun Mercado niingon nga bisan pag mapildeng
mga balaodnon, daog na silang daan: Kay segurong hatagan na silag mas
makiangayong atensiyon sa Kapitolyo human ning ilang pagtingog. [30]
Email: leo_lastimosa@abs-cbn.com
_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/
