SUGA SA SCR
Mga suyak nga hinimo gikan sa dagkong lansang nakapahiyos sa ligid sa labing menos napu ka mga sakyanan nga niagi sa South Coastal Road (SCR) dayong alas-7 sa gabii niadtong Huwebes. Nahitabo ni tungod sa Sugbo building, ang labing unang natukod sa South Reclamation Project (SRP). Samtang di andam ang mga motorista nga molambigit sa pagpanuyak sa pasidaan ni Cebu City Mayor Tomas Osmena nga itingob ang iyang atensiyon sa SRP inay sa pagbantay sa SCR, pero nagduda sila nga tinuyo ug dili aksidente ang pagpanuyak.
Tungod sa nihit nga presensiya sa mga sakop sa City Traffic Operations Management (Citom) ug sa SRP police, ug sa deklarasyon sa Cebu City Hall nga di sila mag-apura pagsuga sa SCR, gihangyo namo ang Traffic Management Group (TMG) sa pagpatrolya sa kontrobersiyal nga dan aron di na masubli ang pagpanuyak ug ubang insidente sa pagkahasol sa mga motorista, sama sa pagtangtang sa "No Entry" sign sa usa ka bahin sa SCR nga gitrabaho—ang mga nabiktima kinahanglang moatras og labing menos usa ka kilometro aron paglahos sa ilang destinasyon.
-o0o-
Giklaro ni Cebu City Vice Mayor Michael Rama nga wa sila mangiyugpos ug magpakahilom sa pagpasera ni Mayor Osmena sa SCR. Pero bisan sa sukwahi nga baruganan sa pipila ka sakop sa City Council, ilang giila ang gahom ug mga sukaranan sa mayor pagpasera sa dan. Karong gipaablihan na sa korte ang SCR sa trapiko, ug bisan sa pangluod ug panghudlat ni Mayor Osmena, nisaad si Rama pag-awhag sa Citom ug sa kapolisan pagseguro nga luwas ang mga motorista.
Niangkon sab si Rama nga mapugos ang City Hall pagtaod og mga suga ug ubang kahimanan sa SCR kon seryuso sila sa padayong kampanya pagkumbinser sa mga negosyante pagbubo og puhonan pagtabang pagpalambo sa SRP, nga kinahanglang mahitabo sa labing daling panahon aron di mosamot pagsangkiig ang syudad pagbayad sa higanteng utang sa proyekto.
-o0o-
Si Chairman Jonathan Guardo sa Cebu City Sports Commission kuwang na lag dyutay nga moluhod atubangan sa lokal nga mga opisyal ug mga negosyante pagpangayo sa ilang amot sa dakong gasto sa pag-host sa Sugbo sa unom ka events sa Southeast Asian Games nga magsugod sunod buwan. Mao nay talan-awon pila ka buwang nilabay. Karon ang pangandam sa grupo ni Guardo maoy labing dasig ug labing bantang sa publiko.
Kini bisan kon ang labing nindot nga events gilamoy sa Manila. Maayo pa ganing Bacolod nga may P50 milyones para sa upat ka events (P10 milyones ray gipisik sa Sugbo). Maayo ba lang si Guardo mosalida sa media? O nilampos siya pagkumbinser sa mga Sugbuanon sa kadako ug kamakasaysayanon sa higanteng kalihokan sa Sugbo sugod sa Nobyembre 25? [30] leo_lastimosa@abs-cbn.com
