HUDLAT UG PIG-OT
Ni-epekto nang labok sa gamhanang makinarya sa Malakanyang nga nagtrabaho og overtime aron paghaw-as ni Presidente Gloria Macapagal-Arroyo gikan sa labing lawom nga gahong nga iyang nahulgan sukad sa iyang pag-asumir sa labing taas nga katungdanan sa nasud kapin sa upat ka tuig nang nilabay. Inanay nang nihakop sa katawhan ang lapad nga kahadlok, nga gipanghinaot sa administrasyon nga maka-iban kon di man makapapas sa inanay nilang pagkakumbinser ug nituybo nilang kasuko batok sa mga gipasanginlan sa bag-ong ebidensiya sa pagmaniobra sa resulta sa niaging eleksiyon.
Human gaposa ang mga kamot ug taptapi ang mga baba sa mga sakop sa media, human padad-i og gatosan ka mga polis ug mga sundawo ug armored personnel carriers ang San Carlos Seminary, human ikiha si kanhi NBI deputy director Samuel Ong, human hudlata ang ubang nagpakabana sa pagpaminaw sa kontrobersiyal nga recording ug human lawgawa ang imbestigasyon sa Kongreso sa samang kontrobersiya, nakapa-alarma bisan sa ligdong nga mga molupyo ang text messages—nga klarong gipasiugdahan sa iresponsableng mga lider sa oposisyon—nga ideklarar nang martial law sa Hunyo 21, ang petsa sa pagkapupos sa ultimatum sa retiradong mga heneral nga nidemanda nga mokanaog ang presidente sa puwesto.
-o0o-
Ang paghudlat sa katawhan ug ang pagpig-ot sa ilang katungod pagpakisayod maoy nakahatag ni kanhi presidente Ferdinand Marcos sa abundang kahigayonan pagsemento sa iyang diktadura. Pero ang katawhan nga beterano sa duha ka Edsa nakat-on na. Di na sila abtan og 20 ka tuig una makamatngon nga kon magkahiusa silay tinuod nga hawod ug silay naghupot sa tinuod nga gahom pag-umol sa kaugmaon ning nasura.
Hinunoa, ang padayong panghudlat ug pagpig-ot sa administrasyon mahimong makapadali hinuon sa pagbugkos sa katawhan, kansang kinabag-an wa pa manginlabot tungod sa pagduda sa kaligdong sa motibo sa mga nisakay sa labing bag-ong eskandalo sa presidente. Kon pit-on gyod sa administrasyon, ang katawhan mas daling makamatngon nga ang gobyernong nangawat og mandato, bisan unsang kamasaaron ug bisan sa kalang-og sa oposisyon, di angayng magpabilin sa gahom sa dugang usa ka gutling.
-o0o-
Mga torotot sa administrasyon nilusad sa labing bag-ong bersiyon sa panagang sa lisod lalison nga audio recording: Bisan nagka-istorya silang Presidente Arroyo ug kanhi Comelec Commissioner Virgilio Garcillano, way ebidensiya nga gitikas ang eleksiyon; nga bisan nagplano silang Arroyo ug Garcillano pagpugos nga usa ka milyon ka boto ang mayoriya sa presidente, way ebidensiya nga aktuwal nga gikuhaan ni Garcillano ang mga botong Fernando Poe Jr. ug gitakli ngadtong Arroyo.
Angayng pahinumdoman si Presidente Arroyo nga si anhing US President Richard Nixon wa kapamatud-ing apil pagsugod sa Watergate scandal. Pero gipalayas siya sa katawhan tungod sa paghimog mas dagkong krimen pagtabon sa gamayng orihinal nga krimen: Ang paglungkab sa headquarters sa Democratic Party sa Watergate Hotel. [30] leo_lastimosa@abs-cbn.com
•
•
Ulat ni PATRICK PAEZ
