DI MAGPATARA
Abunda ang mga ebidensiya nga giwaling ni Presidente Gloria Macapagal-Arroyo ang binilyon ka pesos nga para unta sa mas dinalian ug mas importanteng mga proyekto sa gobyerno ngadto sa iyang kampanya pagseguro sa iyang kadaogan sa eleksiyon sa niaging tuig. Nilingiw ang mga botante sa makauuwaw niyang pagpabaha sa kuwarta para sa nagkalainlain niyang gimik kay para nila mas mameligro ang nasud kon modaog ang nag-unang kaatbang nga si Fernando Poe Jr.
Kon nahibawo pang mga botante nga kabahin diay sa kuwarta sa gobyerno gigasto para sa higanteng maniobra ni kanhi Comelec Commissioner Virgilio Garcillano paglubag sa resulta sa eleksiyon sa Mindanao ug ubang bahin sa nasud, di kong kaseguro kon sama ba sila kamapasayluon.
-o0o-
Karon, samang mga tilimad-on sa pagwaling sa nihit nang daan nga kuwarta sa lokal ug nasudnong panudlanan gikan sa mas dinalian ug mas importante untang mga proyekto ngadto sa iyang kampanya pagseguro nga magpabilin siya sa katungdanan. Ang labing uwahing ebidensiya mao ang bantang, pabaga ug papating nga paghinakotay, pagpakaon ug pagsuburno sa gibanabanang 120,000 ka mga tawo nga nagtapok sa Luneta niadtong Sabado aron pag-abiba ni Presidente Arroyo:
· Managsama ang kolor ug marka sa t-shirts ang mga tawong gipanghakot sa de-numerong mga sakyanan gikan sa nagkalainlaing bahin sa Metro Manila ug sa Luzon;
· Mga ambulant vendors nangreklamo nga wa silay halin kay nagsobra ang pagkaon, tubig ug softdrinks nga giapod-apod sa tibuok Luneta;
· Pipila sa mga nangapil niangkon nga napugos sila pagtambong kay gi-check ang ilang attendance ug gipangsaaran silag P1,500 para sa mga kawani sa gobyerno ug P500 para sa ordinaryong mga molupyo; ug
· Kasagaran sa nanambong nagsige lang og tabi ug lakaw-lakaw, klarong wa maapil sa bayad nga mamakpak sila matag higayon nga dayegon sa stage si Presidente Arroyo.
-o0o-
Sa pikas nga bahin, di ko andam nga manalipod nga wa panghakota ug pangsuburnohi ang mga nanambong sa rally sa oposisyon sa Makati City niadtong Miyerkules. Tradisyonal sang mga politiko sila si Makati City Mayor Jejomar Binay ug ubang lider sa oposisyon.
Maong masulub-on kaayo kon ang kinabag-an igo lang magtan-aw sa duha ka grupo nga nibasura sa tanang lagda sa kaligdong aron pagdason sa ilang nagkasungi nga pangangkon nga silay gipaluyohan sa mayoriya.
-o0o-
Di hangtod sa hangtod nga magpakahilom ang kinabag-an. Moabot rang higayon nga ipahamtang ang ilang kabubut-on.
Kumbinsido na sila nga nanikas si Presidente Arroyo sa niaging elksiyon ug busa angay siyang pakanaugon sa Malakanyang. Pero mas nagduda sila sa kaligdong sa mga mopuli pagduma sa nasud.
Padayon kong nisalig sa kaligdong sa kinabag-an. Di sila paspas, ni lantip ug makinaadmanon. Pero way makasukol ni makapugong sa ilang hiniusang pagbarug ug paglihok. [30] leo_lastimosa@abs-cbn.com
