Gibungul-bungolan. Wa hatagi og importansiya. Mao nay atong gihimo sa mga pahibawo sa Pagasa sa mga adlaw nga way bagyo. Unya na ta ma-interes kon mobunok ang kusog nga uwan, labi na kon mosangpot sa pagbaha o pagdahili sa yuta. Mahimangod pa gani ta kon nihit ang weather bulletins sa mga adlaw nga may nag-ung-ong nga kusog nga bagyo.
Mao sab ni atong gihimo sa mga pahibawo sa Metro Cebu Water District (MCWD). Maayo na lang tang magyawyaw kon wa nay agas ang gripo inig mata nato sa sayong buntag. Modayon ra ba ta og pasangil sa MCWD nga wa magpasidaan nga maputol diayng suplay sa tubig.
-o0o-
Mao ni nahitabo niadtong tibuok Dominggo hangtod sa Lunes sa udto. Kadlawon pa lang nagbaha nang text messages gikan sa mga nawad-an og tubig sa Mandaue City, Cebu City, Lapulapu City, Consolacion ug Liloan: Nganong way agas?; nganong wa sila pasidan-i?; ug kanus-a mobalik ang tubig?Nipasabot ang MCWD nga gipahibawo nilang mga konsumidor sa gitakdang pag-ayo sa mainline sa taytayan sa Butuanon. Apan way nibasa sa ilang notisya sa mga pamantalaan, ni naminaw sa ilang public service announcements sa mga sibyaanan sa radyo ug telebisyon. Hagit sa public affairs department sa MCWD ang pagpangita og mas epektibong paagi pakiglambigit sa mga konsumidor.
-o0o-
Palambuon bang ilang presensiya sa Facebook, Twitter, Google+ ug ubang social media networks? Kumbinsihon bang mga sakop sa media nga hatagan og mas dakong importansiya ang ilang mga pahibawo? Magpatabang ba sa lokal nga mga opisyal paghimo og agresibong rekurida sa maapektahan nga mga lungsod ug mga barangay?Way mawa sa MCWD kon himuon nila ang tanan sa ibabaw. Silay labing nahibawo sa kamahinungdanon sa tubig, kon unsa kadako ang kahasol kon mabalda ang suplay, ug kon unsa kadinalian ang panginahanglan sa pagpasidaan sa mga konsumidor aron makapangita og alternatibo nga mga tinubdan ug makapahaom sa ilang kalihokan.
-o0o-
Gikinahanglan sab ang mas suod nga pagtinabangay sa MCWD ug local government units (LGUs). Kon nakapasidaan pa lang unta ang MCWD nga molungtad og usa ug tunga ka adlaw ang pagkaputol sa suplay sa tubig, ang LGUs sa Mandaue, Sugbo, Lapulapu, Consolacion ug Liloan makapalihok unta og water tankers, apil nang mga trak sa kabomberohan, aron pag-rasyon og tubig sa labing naapektahan nga mga dapit.Hinaot di na masubli ang wa kinahanglanang kahasol. Problemang daan ang pagkawa sa tubig, nasamotan pa gyod sa pagpangiyugpos sa LGUs. Samtang atong awhagon ang MCWD pagsubay sa ilang mga tubo, aron maayo dayon sa di pa modako pag-ayong kadaot, angay sang bansay-bansayon ang atong kaugalingon sa di pag-isnab sa mga pahibawo sa tubig, kuryente ug bisan sa maayong kahimtang sa panahon. [30] leo_lastimosa@abs-cbn.com
