Thursday, October 06, 2005

Arangkada for October 7, 2005

Bookmark and Share
 

     LAMBO ANG NASUD

 

Kon tumanon ang awhag ni Pres. Arroyo nga hunungon nang mga imbestigasyon sa Senado ug House of Representatives sa mga pasangil batok niya aron maghiusa nang tanan ug magtinabangay pagpalambo sa nasud, di ang presidente ray makapahuway sa mga kontrobersiya nga naghamok karon sa nasud:

  • Kon mohunong nang mga senador ug mga kongresista pagsusi sa Garci tapes, gawasnon nang makapauli si kanhi Comelec commissioner Virgilio Garcillano gikan sa New Jersey, London, o Brazil ug makatabang na pagpalambo sa nasud, labi na sa Comelec ug sa kaligdong sa sistema sa eleksiyon;
  • Kon mohunong nang mga senador ug mga kongresista pagsusi sa jueteng payola, gawasnon na si Bong Pineda ug ubang suspitsadong gambling lords nga motabang pagpalambo sa nasud pinaagi sa pagpabaha sa ilang kamanggihatagon di lang ngadto sa mga politiko ug election officers kon dili ngadto sab sa mga obispo ug sa ilang kabos nga mga parokyano nga nangapaso sa donasyon sa Pagcor;

-o0o-

  • Kon mohunong nang mga senador pagkuti-kuti sa mga kontrata sa Venable LLP ug North Rail project, gawasnon na unyang mga langyaw nga motabang pagpalambo sa nasud pinaagi sa pag-usab sa konstitusyon ug pagpasiugdag mga proyektong way subasta;
  • Kon mohunong na si kanhi sen. Loren Legarda pagprotesta sa kadaogan ni Bise Pres. Noli de Castro, makatabang na unya sila pagpalambo sa nasud pinaagi sa pagkuyog og usa lang ka programa pagbasa sa mga balita nga pulos makaayo sa presidente;
  • Kon mohunong na si kanhi pres. Cory Aquino pag-awhag sa resignasyon ni Arroyo, di na iapod-apod ang Hacienda Luisita ug ang ubang napasagdang mga luna ngadto sa mga mag-uuma aron mas mapalambo pa gyod ang nasud; ug
  • Kon mohunong nang Makati Business Club pagsuporta sa kampanya pagpalagpot ni Pres. Arroyo, di na sila istriktuhon sa buhis ug mga lagda sa pamuo aron makabuylo na gyong pagpalambo sa nasud.

-o0o-

Kon ang diwa sa panagdait manakod sa Sugbo, dako kaayong kausaban nga mahitabo sa kinabuhi sa mga Sugbuanon:

  • Kon di na mag-away silang Cebu City Mayor Tomas Osmena ug Kongresista Eduardo Gullas, matikad na gyong South Reclamation Project, makaagi nang tanang motorista sa South Coastal Road, mabayran nang dakong utang ug, labaw sa tanan, makalimtan nang mga pasangil sa anomaliya sa titulo ug cityhood ug mapalambo nang nasud;
  • Kon isibog nang protesta ni kanhi kongresista Celestino Martinez Jr., mosugot na si Gob. Gwen Garcia nga buk-on ang Sugbo, makapuwesto nang tanang politiko ug ilang mga dumadapig, motidlom ang unemployment rate ug mapalambo nang nasud; ug
  • Kon hunungon nang imbestigasyon sa mga anomaliya, mas makahilo nang mapalit nga kemikal nga way bawot sa dengue ug mas daghan nang diploma ang kaluwatan sa CSCST aron mas mapalambo pa gyong nasud. [30]  leo_lastimosa@abs-cbn.com