KUYOG BABOY
Bisan kinsa pay utok sa hudlat—ang mat-an-pas-pinyang si Pres. Arroyo o ang nagmabisyon-sa-langit nga si Kongresista Prospero Pichay—tinuod nga nameligro sa puwesto si House Speaker Jose de Venecia. Kon ang presidente maoy nagsugo ni Pichay paghagit ni de Venecia, segurong mataktak sa liderato sa Kongreso ang labing suod nga alyado ni kanhi pres. Fidel Ramos. O segurong mamilok si de Venecia pagdemanda nga putlon ang termino sa presidente. Kay samtang mapasalamaton si Arroyo sa cha-cha (charter change) nilang Ramos ug de Venecia isip mas madanihong alternatibo kay sa gubot nga pagpalagpot sa presidente dihang nameligro pa pag-ayong administrasyon niadtong Hulyo, nakabuylo nang paugat ni Arroyo maong makigkamatay na pagtiwas sa iyang termino hangtod sa 2010.
-o0o-
Bisan batok nilang Ramos ug de Venecia. Mas sayon nga target si de Venecia di lang tungod sa makabungog nga mayoriya sa mga kongresista nga niluba sa impeachment complaints batok ni Arroyo kon dili, ug labi na, tungod sa kadali ra sa mga kongresistang lawogan og suburnong kuwarta ug mga proyekto.
Ang kahangol sa gahom mahimong makapugos nilang Pichay ug de Venecia pagpadaplin sa ilang away. Gawas pa, ang mapilde segurong mahimong bag-ong lider sa oposisyon. Nga mas lig-on na unyang mobanhaw sa impeachment ni Arroyo sunod tuig.
Maong, bisan sa tanang tayad sa pikas ug pikas, ug bisan gihalingan sa Malakanyang ang panagsungi, di ni sila mag-unay. Igo lang nagpatas-anay sa ihi. Sa panghinaot nga, sama sa naandan, mokubit ug malipat na sang ilang mga kaatbang.
-o0o-
Pero ang labing uwahing tinubdan sa mga urom ni Arroyo di na ang mga lider sa oposisyon kon dili ang usa sa labing sinaligan niyang alyado, si Bro. Mike Velarde sa el Shaddai. Kay ang labing uwahing mga postura ni Velarde di pabor sa presidente:
-
Pagsugyot og power-sharing, nga 60% sa gabinete itugyan ngadto sa oposisyon;
-
Pagsaway sa CPR (calibrated preemptive response) ug no permit no rally policies batok sa lehitimong mga protesta batok sa administrasyon; ug
-
Pag-awhag og snap presidential election sa 2007.
Nganong nangisog na man si Velarde bisan sa tanang huhapuhap sa Malakanyang? Gusto ba gyong motabang pagsulbad sa krisis o, sama sa naandan, nagpagamit na sab sa mga politiko?
-o0o-
Daghang nabalaka parang Arsobispo Ricardo Kardinal Vidal. Kay samtang nagsigeg awhag sa pangaliya para sa kalinaw, wa motukol nga gibira-bira sa nagkasunging mga grupo nga niresulta sa sud-gawas niyang baruganan sa CPR ug ubang kontrobersiya.
Karong bag-o, mora siyang kuyog-baboy ug nagsigeg sumay-sumay sa bisan unsang sulti ni Velarde. Nahimo na bang disipulo sa lider sa El Shaddai nga mas naila sa daghang eskandalo kay kasuhito sa relihiyon? [30] leo_lastimosa@abs-cbn.com
