DAGWAY SA INHUSTISYA
Dul-an sa 24 oras nga nagpila sa Ayala Center ang gibanabanang kapin sa 30,000 ka mga molupyo sa Sugbo ug kasilingananang mga probinsiya nga namasin nga makaapil sa Wowowee, ang popular nga game show sa ABS-CBN, nga sa labing unang higayon ipahigayon sa Sugbo karong Sabado. Miyerkules pa sa hapon nga nagsugod og tapok ang mga tawo. Nagpunsisok na pag-ayo pagka Huwebes sa kadlawon. Hingpit na gyong naghuot pagka buntag hangtod na sa hapon, kanus-a gibola ang tanang mga ngan ug maoy gipilian sa palarang 50 nga makaangkon og kahigayonan pagdaog sa minilyon ka pesos nga balor sa mga premyo.
Silay dagway sa pamasin. Sila say simbolo sa kapait, kalisod ug katimawa sa kinabag-an. Sa sunod higayon nga gustong magpa-pogi ang administrasyon pinaagi sa pagpa kyut-kyut sa gubat batok sa kakabos, hinaot nga hamukon ang ilang mga tanlag sa makaluluoy nilang mga bayhon.
-o0o-
Usa sa labing unang nipila sa Ayala maong taga Masbate nga nangandoy nga mapaayo ang gubaon niyang bay kon siyay makadaog sa "Pera o Bayong" sa Wowowee. Tapad niya ang Bol-anon nga nangindahay sang mapatambalan ang grabeng sakit sa iyang kapikas. Sa tumoy sa pila ang taga Samar nga naglaom nga mahaw-as ang iyang pamilya sa dako nilang utang. Pila lang sila sa kaliboan nga di taga Sugbo nga andam nga magbanig sa kasagbotan sa Ayala o moligdas sa mga aseras sa syudad sud sa tulo ka adlaw nilang pinaabot sa grupo ni Willie Revillame.
Di monopoliya sa mga dayo ang damgo sa mas hayag nga ugma. Sama sab kadeterminado ang mga Sugbuanon paglugtab sa talikala sa kauyamot nga nigapos nila. Maong wa kalikayi ang pagtudlanay, pag-ulbo sa away ug pagkatumbang nawad-an sa panimuot sa pipila tungod sa grabeng kainit ug kahuot. Maong sa sunod higayon nga gustong manghambog ang mga politiko nga nilampos sila pagbutang og pagkaon sa matag talad kan-anan, hinaot nga ang nagbaha nga singot, luha ug dugo sa mga kabos ang motuhop sa kinauyokan nga bahin sa ilang mga kasingkasing.
-o0o-
Tuguting akong sublion: Di katapolan sa katawhan ang nakapatidlom ning nasura. Nagpunsisok sila para sa batakang mga serbisyo ug panginahanglan sa Halad sa Kapamilya sa Plaza Independencia, sa rehistrasyon sa Wowowee sa Ayala ug sa rehistrasyon ug screening sa Local ug International Job Fair sa ABS-CBN Broadcast Complex di tungod sa kataspok.
Abunda ang mga ebidensiya sa ilang kakugi. Wa lang sila kahatagi og makiangayong kahigayonan sa pagpanginabuhi. Napugos sila pagpamasin kay gihinginlan gikan sa ilang mga umahan, gitaktak gikan sa ilang mga trabahoan, gipalayas gikan sa ilang mga pinuy-anan ug gihikawan bisan sa labing batakang mga katungod nga gihatag na unta sa balaod ngadto nila.
Sila ang kinabag-an. Silay dagway sa higante ug kapid-an na ka tuig nga inhustisya. [30] leo_lastimosa@abs-cbn.com
