SINGIL SA CICC
Tungod sa nagkapupos na nga pailob sa Sugbuanong mga magbubuhis, mahimong pahamtangan na nila og kinutoban ang likaylikay, hikuhiko ug pagtak-om nilang Gobernador Gwen Garcia ug ubang opisyal sa Kapitolyo mahitungod sa nalangay na nga subay sa makalilisang nga gasto sa Cebu International Convention Center (CICC). Tungod sa taas nang lugway nga ilang gihatag, ang katawhan di na kapugngan nga maningil, ug mas maisugon na ning higayona kay sa niadto nga gibungulbungolan ug gilipatlipat lang sila, diin padung ang buhis nga bunga sa ilang kahago ug pagtukaw.
Maong mapugos silang Garcia ug kaubanan, sa gusto nila o sa dili, pagtuman sa dugay na nilang gisaad, ug mas dugay nang gipangayo, nga kuwentada. Karon na. Di unya sa liwas na sa piniliay sa Mayo 14. O kon kanus-a sila ganahan nga mopasabot giunsa paggasto ang higanteng kantidad nga di ila. Ang pag-ulbo sa eskandalo sa papating nga overpricing sa decorative ug street lamps sa 12th Asean Summit maoy nakabisto sa kataphaw sa lusot sa mga kurakot nga igo nang pasidunggan nato sila sa kalamposan sa summit ug di na lang pangitaan sa ilang obligasyon paghimog kuwentada.
-o0o-
Gawas sa gidudahan nga pag-usik-usik sa buhis sa mga Sugbuanon, ang CICC magsilbing bantayog sa pagpabaya ug panagkonsabo sa kadagkoan sa Kapitolyo aron lang makapatuyang silang Garcia ug kaubanan pagpanghambog nga, bisan taliwa sa katimawa sa sa atong katawhan ug sa napasagdan nga nagbuntaog nilang mas dinaliang mga panginahanglan, makahimo ang atong mga tagduma pagwaldaswaldas atubangan sa langyaw natong mga dinapit.
Ang oposisyon nga mga sakop sa Cebu Provincial Board nipadaplin sa ilang pagsupak ug nakig-uban sa pagkarakara paggahin sa kapin sa tunga sa bilyon ka pesos. Bisan ang mga sakop sa media giawhag sa pagpakahilom ug paghunong pagsaway sa pagtukod sa CICC ug sa pagpatuman sa uban pang mga proyekto sa summit. Ug ang pipila nga wa mosanong sa lapad nga kampanya sa pagtak-om gihudlat sa pasangil nga gawas nga wa sila mahigugma sa Sugbo, nisabotahe pa gyod sa talagsaong kahigayonan pagpasundayag sa labing luho nga dagway sa mga Sugbuanon ngadto sa tibuok kalibotan.
Kining tanan gitumong aron lang makapatuyang silang Garcia ug kaubanan sa naghitinghiting nilang kahigal sa pagpaggawal nga matuman nila bisan unsay ilang gusto, bahala nag naglaway nga nagtan-aw ang gipanggutom nga kinabag-an nga maoy tinuod nga mga tag-iya sa kuwartang ilang giusikan.
-o0o-
Human ta nila pahiloma ug pakiyugposa, unsay nahitabo? Nalutsan ta sa minilyon ka pesos nga anomaliya sa mga suga ug sa uban pang mga proyekto nga hangtod karon wa pa matarung sa pagsusi, salamat sa padayong pagtago nilang Garcia ug ubang mga tigpasiugda sa mahinungdanong mga dokumento.
Makiangayon man lang tingali nga bisan uwahi na magpakabana, mobarug ug maningil ta. Ug di na ta nila ma-unya-unya pa. [30] leo_lastimosa@abs-cbn.com
