BAHA SA LAPOK
Mao diayng wa nay tarung kinatulgan si Pres. Arroyo. Ang labing importanteng mga desisyon nga iyang giluwatan ning nangaging mga adlaw naumol sa lawom nang mga takna sa kagabhion. Ang labing bag-o mao ang iyang pagdili ni Heneral Francisco Gudani sa pag-atubang sa imbestigasyon sa Senado. Gipakanaog sa presidente ang sugo sa ala-una na sa kadlawon sa adlaw sa pag-testify nilang Gudani ug Koronel Alexander Balutan.
Kaniadto rang nahibaw-an sa kadaghanan sa talagsaong lahutay sa presidente sa pagtrabaho. Sayo kaayo siyang momata sa buntag ug kasagaran maabtan og hapit na tungang gabii una mopahuway. Kon itandi sa iyang gisundang si kanhi presidente Joseph Estrada nga gipasanginlang buntagay nga nakig-inom ug nakigsugal sa iyang barkada sud sa Malakanyang, daghan ang nihangop sa kakugihan sa presidente.
Daghan hinuong nagduda nga ning mga adlawa mas dako ang panahon nga gigahin sa presidente pagpalambo sa iyang kahigayonan nga magpabilin sa gahom inay sa pagpalambo sa interes sa nasud ug sa katawhan.
-o0o-
Ang mosunod nga mga adlaw makasaksi sa makalilisang nga pagbuong sa kadungganan ni Gudani. Ang giawhag nga lifestyle check giunhan nag lapad ug makuting pakisusi pagdugkal sa mga aspeto sa kinabuhi sa Pamilyang Gudani nga may lama sa kahiwian. Ang pagdaot ni Gudani mao ray dag-anan ni Pres. Arroyo pagpapas sa dakong sakripisyo sa kontrobersiyal nga heneral.
Kinsa man tuod ang makalalis sa kaisog ug kaligdong ni Gudani? Nangahas siya pagpahibawo sa mga senador, pila na lang ka adlaw sa di pang iyang pag-retiro ug pagsugod nag pahimus sa makabuhong niyang pension, sa iyang pagdudang gimaniobra ang eleksiyon sa niaging tuig dihang kalit siyang gitangtang gikan sa iyang kamandoan. Makahimo pa gani unta siya pagbalibad nga di mapasanginlang talawan tungod sa gidalidali pagpahamtang nga pagdili sa presidente.
Maguba lang si Gudani kon kapamatud-an sa Malakanyang nga gigamit siya sa oposisyon pag-apiki sa presidente. Pero way laing ebidensiya ang palasyo sa ilang pasangil nga si Gudani dumadapig ni anhing Fernando Poe Jr. gawas sa ilang pagtapad og lingkod sa ayroplano paingon sa Mindanao.
-o0o-
Gawas ni Gudani, paborito sang mga target sa mga ahente sa pakauwaw sa Malakanyang silang kanhi presidente Corazon Aquino ug Senate Pres. Franklin Drilon, kinsa gipasanginlang mga utok sa giingong plano pagpatay ni Pres. Arroyo karong buwana. Si Aquino gihudlat nga kuhaan sa iyang Hacienda Luisita sa Tarlac samtang si Drilon gilambigit sa giingong anomalusong proyekto sa Iloilo .
Pero ang mabuot nga katawhan nakabantay na sa kampanya sa pagpangilad sa administrasyon. Way tihiktihik ang mga pasangil bisan way ebidensiya. Kon way motoo, mag-imbento na sab og bag-ong mga pasangil. Ang way kinutobang pagpabaha og lapok gipanghinaot sa presidente nga, kon di man makapabulingit sa iyang mga kaatbang, igo gyong makapalibog sa katawhan. [30] leo_lastimosa@abs-cbn.com
