Sa labing uwahing ihap sa Professional Regulation Commission (PRC), 187,000 ka lisensiyadong nurses ang way trabaho. Maong giawhag sa Department of Labor and Employment (Dole) ang mga tinun-an ug ilang mga ginikanan sa paghunong na pagkuha sa kursong nursing aron nga di sila mapuno sa nagkataas nga listahan sa mga gradwado sa nursing nga way trabaho. O napugos pagdawat og mas ubos nga mga trabaho. Bisan mga trabaho nga layo ra kaayo sa ilang kurso.
Apan unsaon na man lang ang mga tinun-an nga nahinayak na pagpa-enrol sa nursing? O ang mga tulonghaan nga nakabuylo na pagpalapad sa ilang kahimanan, ang uban nagtukod gani og ilang kaugalingong mga tambalanan, kay gipakaingon nga molungtad hangtod sa hangtod ang uso.
-o0o-
Kinsa man tuod ang magdahom nga mokalit lang og awop ang kalibotanong demanda alang sa atong nurses? Pila ka tuig ang nilabay masaligon ang tanang hingtungdan nga minilyon ka nurses ang gikinahanglan sa nagkalainlaing kanasuran. Hangtod gani sa niaging tuig gibanabana nga sa Estados Unidos lang 600,000 ang gikinahanglan hangtod sa 2020.Maong bisan ang mga doktor nangeskuyla og nursing. Bisan ang mga tulonghaan nga way hibangkaagan sa natad nangahas pagtanyag sa kurso. Namasin nga makabahin sa nagbaha nga kuwarta ug interes sa mga tinun-an ug mga ginikanan. Bahala nang kabos nga kalidad sa ilang mga gradwado.
-o0o-
Hangtod nga nahagsa ang kalibotanong panalapi. Labi nang ekonomiya sa Estados Unidos. Sa kalit lang nitak-op ang kahigayonan sa nurses sa ubang kanasuran. Sa kalit lang gibabagan ang tanang aplikante nga nurses pagsud sa Estados Unidos. Bisan ang mga nadawat na unta og trabaho sa mga tambalanan sa nagkalainlaing mga estado.Bisan ang lokal nga mga tambalanan namalibad na sab. Gibahaan na sa nurses, ang uban boluntaryo na gani, nga sobra na kaayo sa ilang gikinahanglan. Maong may pipila nga mao na lay nibayad sa mga tambalanan bugti sa makuha nilang kasinatian. Alang sa kahigayonan sa ubang kanasuran nga wa pa mahibaw-i kanus-a moabot.
-o0o-
Mao ni sangpotanan sa pag-iyahay sa mga institusyon sa edukasyon ug pamuo: Ang mga tulonghaan, inay motabang paggiya sa mga tinun-an ug mga ginikanan unsay labing tukma ug mapuslanon nga mga kurso, nipaundayon hinuon sa baha sa pagpataka; ug ang kagamhanan ug mga industriya wa sab gyong kapahibawo sa mga tulonghaan unsay tinuoray nga mga panginahanglan, sa wa pa unta mausik ang panahon ug hiniposan sa mga biktima.Karon, uwahi nang tanan. Daghan nang nangasaag. Ang maayong balita mao nga nagkaabot na ang mga tulonghaan, kagamhanan ug mga industriya. Ang daotang balita mao nga wa gihapoy nahitabo. Daghang salamat sa mga gapos sa burukrasya, padayon nga gilawog ang mga tinun-an sa gahong nga way kinutoban. [30] leo_lastimosa@abs-cbn.com
