KKK KOLORUM?
Giklaro sa Securities and Exchange Commission (SEC) nga di pa makahimo
pagsud sa bisan unsang transaksiyon ang Kaibigan ng mga Kawal sa Kapuluan
(KKK) kay wa pa sila marehistro. Matod ni Atty. Lorna Cubero, abogada sa
SEC 7, ang reservation sa ngan nga KKK wa mohatag og katungod sa grupo sa
pagdawat og mga donasyon ug pagtukod sa multi-milyones pesos nga beach
resort sa Boracay sa ngan sa Armed Forces of the Philippines (AFP).
Karong napamatud-an nga dako diayng kolorum ang KKK, mangugat ba gihapon
ang mga tigpasiugda nga lehitimo ang ilang kawsa? Kon gilapas nila ang
labing batakang lagda sa pagtukod og foundation, unsa may garantiya sa
publiko nga di nila lapason ang ubang mas importanteng mga balaod aron
ipamugos ang ilang nahunahunaang kiat-kiat sa Boracay aron pagsulbad sa
kagutom ug katimawa sa kasundalohan?
-o0o-
Human gideklarar ang GSIS nga labing kurakot nga ahensiya sa gobyerno,
gipahibawo dayon ni Winston Garcia, presidente ug general manager sa GSIS,
nga nagpadayon nang lapad nga kampanya paglimpiyo sa mga anomaliya sa
ahensiya. Gisubli niya ang makalilisang nga kasayuran nga sa 2.7 milyones
ka mga sakop sa GSIS, 1.4 milyones ang nasakpan nga peke. Gipasidunggan ni
Garcia ang computerization nga iyang gipasiugdahan niadtong 2003 nga maoy
hinungdan sa pagkabisto sa �ghost� GSIS members.
Pero makapahibung nganong hangtod karon wa pay bisan usa sa 1.4 milyones ka
�ghost members� ang napasakaan niya og kaso. Labawng makapahibung ang akong
nahibaw-an gikan ni Mitos Galicinao, lokal nga tigpamaba sa GSIS, nga di
mokapin sa 10 (kay niingon man siya nga maihap ra sa tudlo) ang �ghost
members� sa Sugbo. Ug sama sa ilang amo, wa sab kakita ang lokal nga mga
opisyal sa GSIS sa panginahanglan pagpasaka og kaso sa peke nilang mga
sakop.
Igo lang niingon si Garcia nga iyang ikiha ang 20 ka kawani sa GSIS, nga wa
sab niya nganli, nga nag-tamper sa ilang records.
-o0o-
Puwerteng lisora ang pagmatuod sa pasangil sa multi-milyones pesos nga
payola sa jueteng nga giingong gidawat sa labing dagkong mga opisyal sa
gobyerno, apil na sa mga sakop sa pamilya ni Presidente Gloria
Macapagal-Arroyo. Maong di angayng pahiyuson ang kaisog ni Wilfredo Mayor,
nga niangkong jueteng operator, pagbarug batok sa mga Arroyo.
Ang nakapait kay ang mga ahensiyang manalipod unta sa mga saksi sa krimen,
inay dasigon pagbisto sa ilang nahibaw-an sa jueteng, nipasidaan na man
hinuon pagkiha nilang Mayor ug sa ubang mokumpisal nga apil sa jueteng.
Maayo na lang kay nisibog sa iyang hulga si Justice Secretary Raul Gonzalez,
nakamatngon tingaling mora siyang berdugo nga nagdupa-dupa sa jueteng lords.
Pero nahimo nang danyos. Gipamatud-an niyang natarantar ang administrasyon
pagpanagang sa mga pasangil batok sa bana ug anak sa presidente. [30]
Email: leo_lastimosa@abs-cbn.com
_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/
