TAPHAWNG PROTESTA
Dili si Winston Garcia, ang Sugbuanong presidente ug
general manager sa GSIS, ang gika-istorya ni kanhi Comelec
Commissioner Virgilio Garcillano sa kontrobersiyal nga audio recording
nga nakatay-og karon ni Presidente Gloria Macapagal-Arroyo. Sukwahi
ni sa pangangkon nilang Kongresista Clavel Asas-Martinez, iyang banang
si Celestino Martinez Jr. ug sa ilang alyado nga si kanhi senador John
Osmena.
Gibalikbalik namong Edgar Gutierrez og paminaw ang 20-segundos nga
istorya parte sa Cebu atol sa programang "Arangkada" sa DYAB Abante
Bisaya ug among naklaro nga way bisan gamay na lang nga kaamgid ang
mapanagan-ong tingog sa wa mailhing lalaki sa recording ngadto sa
hawod kaayong tingog ni Garcia. Lisod sang toohan ang laing pasangil
ni Osmena nga iya ni Pagcor Chairman Ephraim Genuino ang linghod pang
tingog.
-o0o-
Sa ako hinuong pagkumparar sa istorya ug sa transcript, mas naklaro
ang nahaunang mga pagduda nga ang wa mailhing lalaki nitanyag og
suburno ni Garcillano sa labing menos duha ka higayon aron dalion ang
pagproklamar ni Gobernador Gwen Garcia. Sa makausa pa, niang
transcript sa Philippine Center for Investigative Journalism (PCIJ) sa
istorya sa telepono niadtong Hunyo 8, 2004 sa alas-8:45 sa gabii:
"Garcillano: Si ano?
Man: Cebu? Yung sa Governor?
Garcillano: Ewan ko kung kaylan aarya.
Man: Pare, kung anong konsiderasyon, pare, ha, paki-declare si Garcia
ha, tinanggal siya eh.
Garcillano: Oo syempre, pinag-usapan natin yun eh.
Man: Basta't may sinabi naman s'ya kung ano raw ang konting pang for
disposal na, basta.
Garcillano: O sige lang, ok lang, oo."
-o0o-
Si Atty. Pablo John Garcia, legal consultant sa Kapitolyo, niinsistir
nga ang paghisgot sa wa mailhing lalaking og "konsiderasyon" mahimong
gamiton nga ebidensiya batok sa mga Martinez. Kay masabot nga ang
lalaki niawhag ni Garcillano sa pagproklamar ni Garcia bisan sa
suburno (konsiderasyon) sa mga Martinez.
Pero mas katoohan ang pangangkon sa magtiayong Junnie ug Clavel nga
ang mga pung "kunsiderasyon" ug "for disposal" nagpasabot sa posibleng
pagsuburno sa mga Garcia ni Garcillano. Gani, dihang akong gigamitan
og headphone, ang transcript nga "for disposal" sayop diay nga
pagpaminaw sa orihinal nga sulti sa "for the boys."
-o0o-
Nahimong taphaw ang pagsaway sa mga Martinez sa giingong tikas sa
eleksiyon sa Sugbo dihang gibakwi ang pagduda sa kalimpiyo sa kadaogan
ni Presidente Arroyo. Giunsa man nila pagseguro nga eleksiyon ra
pagka gobernador ang gimaniobra? Giunsa man sab nila pagseguro nga
ang 20 segundos rang istorya parte sa Sugbo sa tulo ka oras nga "Garci
tapes" ang katoohan?
Dihang gideklarar ni Kongresista Martinez nga kumbinsido siya sa
kabahin sa recording, iyang gihatagan og boto ang tibuok recording.
Maong samtang klarong pamolitika ang pagdeklarar niyang persona non
grata, di nang kapili si Martinez unsa rang bahina sa eleksiyon ang
iyang tungluhon. [30]
