KAKAK SA KAMATUORAN
Ang administrasyon ni Presidente Gloria Macapagal-Arroyo, pinaagi nilang Press Secretary Ignacio Bunye ug NBI Director Reynaldo Wycoco, maoy labing unang nipahibawo nga ilang isumiter ngadto sa mga eksperto ang kontrobersiyal nga audio recording sa giingong istorya nilang Presidente Arroyo ug kanhi Comelec Commissioner Virgilio Garcillano aron masusi tinuod ba o minao-mao. Pero human nipadayag og interes ang gobyerno sa Estados Unidos pagtabang paghiling sa kamatinud-anon sa recording, nikalit lag likoy ang Malakanyang:
- Si Bunye niangkon na nga mahimong nasayop siya sa pagpagawas sa recording ngadto sa media ug sa pag-ila sa usa sa mga tingog nga iya sa presidente ug nga way pagtugot ang iyang mga lakang (ang iyang pagpabilin sa puwesto nakapapas na hinuon sa bisan unsang pagduda kon buotbuot ba tong iyang gihimo; ug
- Si Wycoco nikakak na nga di makiangayon nga ang iyang ihatag sa Federal Bureau of Investigation (FBI) mao ang di orihinal nga kopya maong iyang giawhag si kanhi NBI deputy director Samuel Ong pagsurender sa iyang giwara-wara nga "mother of all tapes."
-o0o-
Karong nagkauyon nang mga grupo nga nagsuporta ni Presidente Arroyo sa Edsa Dos pagsumiter sa recording ngadto sa independenteng mga eksperto, mahimong makaangkon na gyod og mas makiangayong katin-awan ang mga pagduda sa katawhan. Kay ang unang duha ka langyawng eksperto nga nideklarar nga matinud-anon ang recording pulos gikontrata sa oposisyon, ang eksperto sa Australia gibayran ni Senador Panfilo Lacson, samtang ang eksperto sa New Jersey binayran ni kanhi senador Francisco Tatad. Ang ekspertong makuha sa mga dumadapig ni Presidente Arroyo, nga gikatakdang mopagawas sa findings sa wa pay SONA sa presidente sa Hulyo, segurong mas katoohan.
Nahadlok hinuon kong di magpatara ang administrasyon ining lakang sa mga grupo sa Edsa Dos. Di man katoohan kon ilambigit sa Malakanyang ang NGOs nilang Laarni Enriquez ug kanhi presidente Joseph Estrada, mahimong kuwestiyunon ang ilang motibo pinaagi sa pagpasangil nga dugay ra silang nitalikod sa administrasyong Arroyo. Hinaot nga di manglawgaw ang palasyo. Aron nga di mosamot ang pagduda sa katawhan nga gusto gyong Presidente Arroyo nga ilubong sa kangitngit ang recording hangtod nga makalimtan kon makakita nag laing kontrobersiya ang katawhan.
-o0o-
Hinaot nga makaangkon sab sa ilang tingog ug kaisog ang ubang mga grupo. Hinaot nga di sila mahadlok nga mo-utingkay sa kamatuoran bisan kon hingpit silang nagsuporta ni Presidente Arroyo ug makiangayon silang nibarug batok sa pangurakot ug ubang nangalisbong mga eskandalo nga niputos sa mga lider sa oposisyon.
Ang pagbisita ni kanhi presidente Corazon Aquino sa biyuda ni Fernando Poe Jr. nga si Susan Roces karong hingpit nang niulbo ang kontrobersiya sa audio recording makahuloganon. Ako mapaubsanong nagtoo nga alyado sa presidente, di lider sa oposisyon, ang makahiusa sa katawhan pagpaningil sa gipig-otan nga kamatuoran. [30] leo_lastimosa@abs-cbn.com
