WAY ALTERNATIBO?
Human napaminaw ang tulo ka oras ug tulo ka CDs nga audio recording sa mga istorya sa telepono sa giilang si Comelec Commissioner Virgilio Garcillano, nakumbinser na ko nga nanikas si Presidente Gloria Macapagal-Arroyo sa niaging eleksiyon. Mahimo na ba kong ikiha?
Ang audio recording akong gi-download pinaagi sa 33 ka buwag nga MP3 files gikan sa web log sa Philippine Center for Investigative Journalism (PCIJ). Mahimo na ba kong ipapriso ni Justice Secretary Raul Gonzalez?
Krimen na ba diay ang pagbarug para sa akong gitoohan nga maoy kamatuoran?
-o0o-
Wa ko mobotar sa niaging eleksiyon. Kay nawad-an na ko og pagsalig sa kaligdong sa sistema sa eleksiyon. Pero usa ko sa mga nakumbinser nga bisan sa tanan niyang depekto, mas takos nga lider si Presidente Arroyo kay sa iyang labing higpit nga mga karibal ug mas sanag ang kaugmaon sa Pilipinas ubos sa iyang liderato.
Pero nakumbinser kong siya gyoy gikasulti ni Garcillano sa telepono ug nga siyay nagsugo nga seguruhong usa ka milyon ka boto ang iyang mayoriya ug nga bahala nag mapilde si kanhi senador Robert Barbers basta di lang paablihan ni Senador Rodolfo Biazon ang ballot boxes sa Mindanao nga mahimong makabisto sa ilang maniobra.
Labaw sa tanan, kumbinsido ko nga wa siyay katungod nga magpabilin sa Malakanyang.
-o0o-
Naproklamar na si Presidente Arroyo. Gibasura na sa Presidential Electoral Tribunal nga gipangulohan ni Chief Justice Hilario Davide Jr. ang protesta ni FPJ ug gibalibaran si Susan Roces pagpadayon sa kaso sa iyang bana. Ang audio recording, bisan mapamatud-an pang tinuod, di magamit nga ebidensiya sa korte.
Di sab magsilbi ang impeachment. Bisan unsa pa kalig-on ang ebidensiya, ang politikanhong proseso mag-agad sa gidaghanon sa mga kongresista ug mga senador nga maningil sa pagtikas ni Presidente Arroyo sa iyang mandato. Kay kon basehan ang kalapad sa maniobra nga nahisgutan sa audio recording, ambot pila ray kandidato sa administrasyon nga wa manikas sa niaging eleksiyon.
-o0o-
Ang nahibiling kapilian mao na lang boluntaryong resignasyon ni Presidente Arroyo. Pero kon basehan ang kabaga sa iyang nawong pagbubalitok sa iyang mga baruganan ug paglingiw sa lapad nga pangurakot sa labing suod niyang mga opisyal, lisod toohan nga kalit lang siyang tugkan og kauwaw.
Wa say kahigayonan ang laing Edsa. Kay way klarong alternatibo ni Presidente Arroyo. Kon wa sila mangalisbo sa mga eskandalo, kadudahan may katakos ba pagduma sa nasud. Ang daotang balita mao nga posibleng mosugot lang ang kinabag-an sa katawhan nga magpabilin ang tikasang presidente sa katungdanan.
Nawad-an na ba kog paglaom? Wa pa. Pabilin kong nisalig sa kaligdong sa kinabag-an. Masaligon kong moabot rang adlaw nga makaamgo nga silay naghupot sa tinuod nga gahom. [30] leo_lastimosa@abs-cbn.com
