KAMERA NI BYRON
Hain na man ang security cameras sa Cebu Provincial Detention and
Rehabilitation Center (CPDRC)? Nganong wa man kapugong sa pagpuga sa laing
piniriso sa niaging semana? Human sa puwerteng panghambog sa Kapitolyo sa
katakos sa security cameras pagbantay sa prisohan, giplanohan na man gani
nga taoran sab sa samang kahimanan ang tanang upisina sa Kapitolyo, nganong
pulos man bulilyaso ang resulta?
Tinuod ba gyong epektibo ang security cameras? O gigamit lang nga
panghudlat ug kahimanan sa propaganda? Ang mas seryusong pangutana: Tinuod
bang giwara-wara aron paglipat sa atensiyon sa publiko sa tinuod nga mga
panghitabo sa CPDRC?
-o0o-
Kahinumdom mo sa retiradong koronel nga si Benjamin Lascona, ang kanhi
consultant ni Gobernador Gwen Garcia para sa CPDRC? Gitangtang siya pila ra
ka buwan human itudlo sa gobernador kay giingong nasakpan sa security
cameras nga nakig-sosyo og shabu uban sa mga piniriso.
Pero dihang giimbestigar nang seryusong pasangil batok ni Lascona, ang mga
torotot sa Kapitolyo niangkon na nga wa diay klaro unsay gitunol ni Lascona
ngadto sa mga piniriso, mahimo diay kunong papel o ballpen ra. Bisan
napamatud-an nga dako diayng bakak ang krimen nga gipasangil batok ni
Lascona, wa gyoy opisyal sa Kapitolyo nga nakahunahuna pagpangayo og pasaylo
sa bangis nilang panamastamas.
-o0o-
Di kay kana ra. Gigamit sab sa Kapitolyo ang security cameras aron
pagpasangil sa pipila ka piniriso nga nihimo sa usa ka bahin sa prisohan nga
hithitanan sa shabu. Pero, sama sa naandan, wa mapamatud-i ang ngilngig
kaayo nilang interpretasyon sa nakuha sa kamera. Ug sama sa naandan, wa
gyod bakwia sa Kapitolyo ang gisabwag nilang sayop nga kasayuran.
Security cameras say ilang gigamit sa pagpasangil nga nagplano ang mga
piniriso sa pagpuga. Ug aron pagduot sa politikanhong mga detenido sa
CPDRC, gipakapin nilag palutaw ang giingong plano sa New People�s Army (NPA)
pagluwas sa mga piniriso. Nahilom hinuon sila dihang si Cebu City Mayor
Tomas Osmena niingon nga lisod toohan ang pangangkon sa Kapitolyo.
-o0o-
Ang padrino sa pagbutang og security cameras sa CPDRC ug sa plano pagbutang
ini sa Kapitolyo mao si Byron Garcia, igsoon sa gobernador ug iyang
consultant para sa seguridad. Nganong ang ordinaryo ra mang jail guards ang
gisuspenso ug wa man gyod kaako si Gwen pagpangayo og katin-awan gikan ni
Byron sa makauuwaw niyang mga sipyat?
Usa sa angayng ipasabot ni Byron, kana kon ang gobernador makabadlong pa
niya: Nganong nakasakop mang iyang paboritong security cameras sa giingong
sekretong transaksiyon nilang Lascona ug sa mga piniriso pero wa kabantay sa
pinirisong si Hector Ricana nga nag-ilis og porontong ug kamisin nga way
braso, niipon sa mga kusinero ug nigawas sa prisohan nga nagda pa og silhig
ug dustpan? [30]
Email: leo_lastimosa@abs-cbn.com
_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/
