GASTO SA SUPORTA
Ang pagarpar sa lokal nga mga opisyal nga nahigugma ang Sugbo kang Presidente Gloria Macapagal-Arroyo gisukwahi sa mas lanog nga mensahe sa ilang mga aksiyon. Gawas nga gibabagan og barbed wire ang agianan atubangan sa "Malakanyang sa Sugbo," gigamitan pa gyod og puwersa ang pagbungkag sa mga demonstrador nga niawhag sa resignasyon sa presidente.
Nganong barbed wire may gibawos sa Malakanyang kon tinuod nga mahigugmaong gigakos sa mga Sugbuanon ang presidente? Ug gipaulbo bang kanyon sa tubig ug bomba tear gas kay nahadlok silang makit-an sa tibuok nasud ug kalibotan nga di diay tanang Sugbuanon nahigugma sa presidente?
-o0o-
Ang paglumbaanay sa lokal nga mga opisyal pagpadayag sa ilang suporta ni Presidente Arroyo di makatabang sa nagtakilid na natong ekonomiya. Ang namiyahok nang daan nga panudlanan sa gobyerno gisamotan pa gyod og kilkil sa mga politiko para sa dagkong gasto sa ilang pagbutang og streamers, pag-organisar ug mga delegasyon paingon sa Malakanyang, mga parada ug rallies sa ilang mga lugar para sa presidente.
Pilay gasto sa mga gobernador sa Kabisay-an sa ilang biyahe paingon sa luhong hotel sa Sugbo aron lang pagtuman sa diktar sa Malakanyang nga isiyagit ang binuang-ug-klarong-panghudlat-lang nilang plano pagtukod og buwag nga Visayas Republic kon mapalagpot si Presidente Arroyo?
-o0o-
Kumbinsido si kanhi gobernador Lito Osmena sa Sugbo nga nanikas si Presidente Arroyo sa niaging eleksiyon. Labaw pa siyang kumbinsido nga bakakong dako ang presidente. Pero nagtoo sab siyang maluwas ang presidente gikan sa krisis nga naghulgang mopalagpot niya sa katungdanan.
Matod ni Osmena ang bugtong lusot parang Arroyo mao ang dinaliang pag-usab sa konstitusyon, nga mas maayong maglakip sa pag-usab sa sistema sa gobyerno gikan sa presidential ngadto sa federal. Nipasabot si Osmena nga mao ra ni ang makapakumbinser sa politikanhong mga partido sa paghatag og lugway sa presidente ug paglingiw na lang gikan sa higante niyang mga bulilyaso.
-o0o-
Pero ang pasidaan ni Osmena nga di hingpit nga kasaligan ang panumpa ni Presidente Arroyo pagsuporta sa gisugyot nga kausaban sa konstitusyon, tungod sa daghan nang mga bakak nga iyang gisabod sa publiko, nakaangkon dayon og lab-as nga sukaranan dihang niinsistir si Rigoberto Tiglao, ang pangu sa Presidential Management Staff nga ang pag-uyon sa presidente sa charter change wa magpasabot nga uyon sab siyang laslasan ang iyang termino.
Sa ato pa, wa gyoy katagbawan ang presidente. Inay magpasalamat sa sugyot ni kanhi presidente Fidel Ramos nga maoy nakaluwas sa iyang administrasyon sa niaging semana, gusto sang motiwas sa iyang termino sa 2010 ug mopahimus sa tanang makabuhong nga mga benepisyo sa labing taas nga katungdanan sa nasud.
Kon lain gyod og sabaw si Arroyo, nipasidaan si Osmena nga dali ra kaayong bakwion sa politikanhong mga partido ang ilang suporta ug hingpit nang mahugno ang administrasyon. [30] leo_lastimosa@abs-cbn.com
